oqartussaaqataaneq

Sermersooq najukkami ataatsimiititaliaqalernissamut piareerpoq

Kommuneqarfik Sermersuumi borgmesteri kommunimi illoqarfinni sisamaasuni innuttaasunik ataatsimiititsisareerpoq, najukkami oqartussaaqataanermut tunngasuni isumassarsiorniarluni

Tasiilami 16-nik ukiullit ataatsimiititaliani ilaatitaqarsinnaanissaat neriuutigineqarpoq

Kommuneqarfik Sermersuumi najukkami ataatsimiititaliaalersussat innuttaasunik tallimanik ilaasortaqassapput, ukiut allortarlugit innuttaasut ataatsimiitinneqarneranni qinerneqartartussanik.

Tamakkuupput Paamiuni, Tasiilami Ittoqqortoormiinilu innuttaasunik ataatsimiititsisarnerni innuttaasut saqqummiukkusutaat.
Nuuk aamma najukkami ataatsimiititaliaqassaaq, kisianni kommunalbestyrelsip aalajangernikuuaa tamanna aatsaat aappaagu pissasoq.

Kommuneqarfik Sermersooq tusagassiutinut nalunaaruteqarpoq.

Innuttaasuttaaq isumaqarput najukkami ataatsimiititaliat, najukkami pissutsit pillugit kommunalbestyrelsimut siunnersuuteqartassasut, aammalu innuttaasut illoqarfitsik pillugu aalajangiisoqassagaangat tusarniarneqartarnissaat qulakkeerneqassasoq.

Innuttaasunik ataatsimiititsinerni tamani suleqatigiissitsisoqartarpoq, suleqatigiikkuutaallu siunissami najukkami ataatsimiititaliaalersussat qanoq ingerlanneqassanersut pillugit apeqqutinik arlalinnik akisassinneqartarput.

Akissutigineqartut ataatsimiititaliat pilersinnissaannut sulinermut ilaatinneqassapput.
Najukkami ataatsimiititaliat aamma najukkani suliassanut atugassanik aningaasanik agguaassiffigineqassapput.

Innuttaasunik ataatsimiititsinerit kingullersaat ippassaq – marlunngornermi – Tasiilap katersortarfiani ingerlanneqarpoq, aammalu sisamanngormat unnukkut inuit 60-it missaat peqataasut najukkami ataatsimiititaliaqalernissaq pillugu oqalliseqataapput.
Tasiilami inuusuttorpassuit innuttaasunik ataatsimiititsinermi peqataapput, tupaallaatiginanngitsumillu isumaqarput inuusuttut 16-inik ukioqalereersimasut ataatsimiititaliani ilaasortaasassasut.

Inatsimmik allannguineq
Illoqarfinni pingasuni innuttaasunik ataatsimiititsisarnerit peqataaffigilluarneqartarput, tamannalu borgmesterimit Asii Chemnitz Narupimit IA-meersumit nuannaarutigineqarpoq.

Inatsisartut ukiakkut ataatsimiinnerminni inatsit allanngortippaat, taamaasilluni najukkami ataatsimiititalialiortoqarsinnaalerpoq, ilaasortat ajunngitsorsiaqarsinnaasunngorlugit.

Kommuneqarfik Sermersooq kommuninit siullersaalluni najukkani ataatsimiititaliaqalernissamut sulineq aallartippaa.

Ataatsimiititaliat sulinissaannut aningaasat kommunimi politikerit allat akissarsiaasa appartinnerisigut, kommunalbestyrelsimilu ilaasortat ikilisinnerisigut nassaarineqarput, Kommuneqarfik Sermersooq nalunaarpoq.

Najukkami ataatsimiititaliaqalernissaq ukiap ingerlanerani kommunalbestyrelsip oqaluuserissavaa.

Powered by Labrador CMS