Sermersooq: Meeqqanut inissinneqartunut saniatigut 60 millionit

Kommuneqarfik Sermersuumi kommunalbestyrelsip marlunngornermi novembarip 21-anni missingersuutit 12 millionit koruuninik sinneqartoorutillit akuerai. Kommunip nalinginnaasumik missingersuutigisartagaanit 25 millionit koruuniusunit affaasa missingaat.

Angerlarsimaffiup avataanut inissiisarnerit amerleriarujussuartut
Ingammik meeqqat angerlarsimaffiup avataanut inissinneqartunut aningaasartuutit missingersuummi malunnaateqartitsipput. Kommuni ukiormanna tamatumunnga saniatigut 46 millionit koruuninik atuisariaqareernikuuvoq.

Kommunalbestyrelsi aappaagumut taakku saniatigut 14 millionit koruuninik immikkoortitsivoq, tamatumunnga katillugu aningaasartuutit 203 millionit koruuninngorlutik, imaluunniit ukiormanna missingersuutinit 60 millionit koruuninik amerlanerullutik. Tassa imaapppoq, kommunit missingersuutaasa arfineq-pingasorarterutaat maanna meeqqanut inuusuttunulllu angerlarsimaffiup avataanut inissinneqarsimasunut atorneqartarput.

Atuaruk: Meeqqat sumiginnakkat annertuumik akiligassiipput

- Ukioq manna missingersuusiap suliarinerani, misigissutsit tamalaat aqqusaarsimavagut. Aningaasaliissutit pisariaqartinneqartut immikkoortissinnaasimagatsigit nuannaarutigaara, tanngassimaarutigaaralu meeqqat atugarliuuteqartut ikiorneqarnissaannut kommunalbestyrelsemi naaggaanngisaannarsimagatta, ukiulli tamaasa pisariaqartitsinerup alliartornera alianartutut isigaara, Asii Chemnitz Narup (IA) tusagassiuutinut nalunaarummi oqarpoq.

Sullissineq tukattoq
Inissiinerit kisimik millionilikkaanik marlunnik kisitsisitalinnik saniatigut atuiffiussanngillat. Meeqqat inuusuttullu atugarliortut sullinneqarnerisa iluarsineqarnissaannut 13,5 millionit koruunit atorneqassapput. Ukiup aallartilaarnerani nakkutilliisut nalunaarusiaasa takutippaat, sullissineq ingerlalluanngitsoq, meeqqallu pisariaqartitaminnik ikiorneqanngitsut.

Atuaruk: Nakkutilliinermit nalunaarusiaq: Nuummi meeqqat pisariaqartitsinerpaat sumiginnarneqartarput

Tamatuma kommuni meeqqanut sullissinermut tunngasunik ineriartortitsinissamik aallartisaatippaa. Pilersaarut ukiaq aallartinneqarpoq, aappaagulu piviusunngortinnissaanut 7,5 millionit koruunit immikkoortinneqarput.

Aammattaaq Meeqqanut Ilaqutariinnullu Aqutsisoqarfiup nukittorsarneqarnissaanut 6 millionit koruuninik immikkoortitsisoqarpoq.

- Aprilimi qinersinerup kingorna suleqatigiinnissamik isumaqaitigiissutitsinni naqissuserparput, uani qinersivimmi meeqqat pingaartitat annersarissagaat. Tamanna soorunami isumaqarpoq, immikkoortortap aningaasaliiffigineqarnissaa. Allatut pigaluarutta unneqarissaarnerussanngilaq. Taamaammat kommunalbestyrelsip tamarmiusup anguniakkagut tapersersorai takullugu nuannerpoq, Asii Chemnitz Narup (IA) allappoq.

2018-imut missingersuutit akerliusoqarani akuerineqarpoq. Taanna 12 millionit koruuninik sinneqartoorfiuvoq, kommunimullu akileraarut 26 procentiuinnassaaq.

Aamma atuakkit:

Meeqqat illersuisuat: Marloriaammik sumiginnaaneq

Nakkutilliinermit nalunaarusiaq: Nuummi meeqqanut suliassaqarfinni makku suliassapput