Sermersooq kulturimut tusintinik untritilinnik arlalinnik agguaassivoq

Illoqarfiit pingaarnersaata kommuneqarfia Kommuneqarfik Sermersooq kommunimi eqqumiitsuliortunut qulinut katillugit 668.840 koruuninik agguaassivoq.

– Ukioq mannattaaq Sermeq-puljemut pitsaasorpassuarnik qinnuteqartoqarsimavoq. Tamanna eqqumiitsuliornermik ingerlatsilluarnermut takussutissaavoq, nuanneqaarlu ukioq mannattaaq aningaasanik tapiissuteqaqqissinnaagatta suliniutit soqutiginartut piviusunngortinnissaannut, borgmester Asii Chemnitz Narup tusagassiorfinnut nalunaarutikkut oqarpoq.

Suliniutit asseqanngitsut

Kommunip erseqqissarpaa Kommuneqarfik Sermersuumi Sermeq-puljep siunertarigaa suliniutit asseqanngitsut, kommunimi eqqumiitsuliortut aaqqissuussaat, tapersersussallugit.

Siunertaavorlu kulturimut aningaasat kulturimik misileraalluni suliniutinik nutaanik pilersitseqataassasut, aammalu kulturimik ingerlatsisut assigiinngitsut, inuussutissarsiortut namminersortut kommunimilu innuttaasut suleqatiginnerisa siuarsarnissaa.

Attaveqaqatigiissitsineq

Kommunalbestyrelsip, ukiut tamaasa Sermeq-puljemit tunineqartussanik toqqaasartup, ilaatigut pingaartippai suliniutit, kommunimi inoqarfippassuarnik attaveqaqatigiissutsisut, kommunimi kulturisiornermi nutarsaasut tamanullu ammasumik ingerlanneqartut.

– Eqqumiitsuliortuvut isumassarsiullaqqissut tamaasa kajumissaarusuppakka suliniutinut, takusimanngisaannakkatsinnut, qinnuteqaateqartaqqullugit, Asii Chemnitz Narup oqarpoq.

Illoqarfiit pingaarnersaata kommuneqarfiani kommunalbestyrelsi aalajangerpoq qinnuteqartut makkua ilaannakortumik tamakkiisumilluunniit tapiissuteqarfiginiarlugit:

Anette Molbech: Ilaqutariinnut suliniummut ´Siunissaq uagut pigaarput´ tapiissutit. Paamiut Asasara-mit misilittakkat tunngavigalugit meeqqanut, inuusuttunut ilaqutariinnullu eqqumiitsuliornikkut, isumassarsiornikkut kulturikkullu sammisaqartitsispoqassaaq, meeqqat inuusuttullu pitsaanerusumik inuuneqalersinniarlugit. 75.000 koruunit

Meeqqat Erinarsoqatigiit Ikinngutaat: Meeqqanut erinarsoqatigiinnermik sammisaqartitsinermut tapiissutit. Suliniut ulluni sisamani meeqqanut inuusuttunullu 8-niit 18-inut ukiulinnut rytmiskimik erinarsoqatigiinnermik pikkorissartitsineruvoq. 21.400 koruunit

Naja Rosing Asvid: Atuakkiap meerarsiutip ´Aqipi på ånderejse´ saqqummersinnissaanut tapiissutit. Atuakkiakkut atuartartut kalaallit oqaluttuatoqaannik tamakkiisumik takutinneqassapput.

Malik Kleist/Timit Production: Oqaluttualiap pissanganartuliap ´Angut tarraqanngitsoq´ filmiliarinissaanut tapiissutit, tassani oqaluttuarineqarluni Angakkoq tigusarineqartoq. 300.000 koruunit

Josef Lund Josefsen: Juullimut cd-liaata nutaap saqqummersinneqarneranut atatillugu Paamiunut juullimi tusarnaartitsiartornissaanut tapiissutit. 25.000 koruunit

Camilla Andersen: Filmiliassamut piviusulersaarummut ´Vejen til AWG´ tapiissutit. Filmi takuneqarsinnaassaaq AWG-p nittartagaani, Facebookimi Youtubemilu. 23.640 koruunit

Nuka Bisgaard: Filmip piviusulersaarutip ´Eskimo Diva´ Tasiilami takutinnissaanut. 34.800 koruunit

Anders Berthelsen: Filmip piviusulersaarutip ´Blok 5´ sananissaanut tapiissutit. ´Blok 5´-imi oqaluttuarineqassaaq Kalaallit Nunaanni sulinermi ajutoornerit ajornersaasa ilaat. 50.000 koruunit

Ebbe Mortensen: Radiokut meeqqanut ammartakkamut tapiissutit. Radiokut ammartakkami sammineqarput qinngasaarineq, pigissaarneq, naammagittarneq, ikinngutigiinneq, qanga ullumikkullu inooriaatsit aammalu qanga ullumikkullu upperisarsiorneq. 24.000 koruunit

Ida Heinrich: Qeqertarsuatsiaani Kapisilinnilu juullimut tusarnaartitsinissaanut tapiissutit. 15.000 koruunit