anisitsinerit

Sermersooq: Isornartorsiuisoqarnera paasisinnaanngilarput

Inissiaatileqatigiiffimmi Inimi ineqartoq saniliminut ernumatitsisarnera pissutaalluni inigisaminit anisinneqarpoq. Eqqarsartaatsimikkut napparsimasut paarilluarneqarnerusariaqartut Ineqarnermut Naalakkersuisoqarfiup Sermersooq allaffigaa

Eqqarsartaatsimikkut napparsimasut Naalakkersuisunit sullinneqarnerat Kommuneqarfik Sermersuup assuaraa

Ineqartoq eqqarsartaatsimigut napparsimasoq Ini-mit anisinneqarpoq, Nuummi inissiani najugaqartut arlaqartut 'eqqarsartaatsimikkut napparsimasuusutut' Inissiaatileqatigiiffimmi Inimi allattorsimasuutigineqalersimasullu Ineqarnermu Naalakkersuisoqarfik Kommuneqarfik Sermersuumut allagaqarpoq.

Eqqarsartaatsimikkut napparsimasut kommunimit pitsaanerusumik sullinneqartariaqartut Ineqarnermut Naalakkersuisoqarfiup Kommuneqarfik Sermersooq isornartorsiorpaa.

- Inissiani najugaqarnissamut najugaqartussatut tulluartuunngillat eqqartorneqartut. Ineqarfimminnit isumaqatigiissuteqarunnaarpata Kommuneqarfik Sermersuup inissarsiuunnissaat sulissutigisariaqarpaa. Aamma sanilerisaminnut ernumatitsisannginnissaat anguniarlugu ikiorsiisoqartariaqarput, Ineqarnermut Naalakkersuisoqarfik allappoq. Allagaq ima nangippoq:

- Kommunimit naliliisoqassappat inuit eqqartorneqartut nalinginaasuni najugaqarsinnaasut, taava kommunip nammineerluni inissiaataani inissinneqassapput, Namminersorlutik Oqartussat inissiaataannut inissinneqassanngillat.

Taama isornatorsiortoqarnera Nuummi kommunip allaffeqarfiani tupigineqarpoq. Kommuneqafik Sermersuummi tarnimikkut nappaatillit innuttani salliutittuarai kommuni allappoq.

-Taama isornartorsiuisoqarnera paasinngivippara. Kommuneqafik Sermersuumi tarnimikkut napparsimasut ikiorsertuarpavut, tamannalu inatsisitigut piumasaqaatit sinnerlugit pisarpoq. Nalunaaruteqartoqartarnera qisuariarfigisarparput, tarnimikkullu napparsimasut ikiorneqarnissaq kissaatigippassuk neqeroorutigisarlutigu, Isumaginninnermut, Suliffissaqartitsinermut Inuussutissarsiutinullu ingerlatsivimmi pisortaq Grethe Nielsen oqarpoq.

Periarfissiissutit
Inatsisitigut pituttorsimasut neqeroorutit saniatigut Kommuneqafik Sermersuumi tarnimikkut napparsimasut orniguttarfeqarput, oqaloqateqarnissamik neqeroorutit, timersorneq aamma qanigisanut paasissutissiilluni ataatsimoortitsinerit, kommuni ilaatigut allappoq. Ineqarnermut Naalakkersuisoq Siverth K. Heilmann, Atassut, ineqartunik anisitsinissamik pisussaaffeqanngitsoq ilaatigut aamma kommunimit oqaatigineqarpoq.

Inuit Piginnaatitaaffii pillugit Suliniaqatigiiffiup naqissuserpaa Ineqarnermut Naalakkersuisoq inuit piginnaatitaaffiinik unioqqutitsisoq qanittukkut taama Kommuneqafik Sermersuumi tarnimikkut innarluutillit Namminersorlutik Oqartussat inissiaataanniit mattukkamigit.

Ombudsmandip Vera Lethip suliaq nammineerluni qaqippaa ingerlatilerlugulu ataasinngornermi nalunaarutigineqarpoq.

Powered by Labrador CMS