Sermersooq isornartorsiorneqaqqittoq

- Kommunimi Pingaarnertut Suleqatigiinnermut Ataatsimiititaq qanoq suliassaqarpa, kiisalu sulisut kattuffii qanoq suliassaqarpat?

Kattuffiit AK, ASG, IMAK, NPK, PPK aamma SIK Kommuneqarfik Sermersuumut ammasumik allagaqarnerminni apeqquteqarput. Kommuneqarfik Sermersuumik ataatsimeeqateqarnerminni ilaatigut aniinnarput qanittumi, aamma Sermersuumik suleqateqarneq kommunimit unitsinneqarpoq.

Ataatsimeereernerup kingorna sulisut kattuffii misigisimapput, Kommuneqarfik Sermersuup pisortaqarfiata suliffeqarfiit malitassaat ilisimanngikkaat imaluunniit malikkumanngikkaat - imaluunniit arlariillugit suusupagigaat. Taamatut misigisimaneq uppernarsarneqarpoq Kommuneqarfik Sermersuumi pisortaanerup 29. oktober tusagassiutinut nalunaarutaa aallaavigissagaanni. Tusagassiummi ima ilaatigut allappoq:

- 'Suliatigut kattuffiit toqqaannartumik kommunimik isumaqatiginninniarsinnaallutik naatsorsuutigisimagaat paasivarput. Soorunami taamaattoqartussaanngilaq. Kommunimi Pingaarnertut Suleqatigiinnissamut Ataatsimiititaq isumaqatiginninniartussaatitaavoq tamannalu soorunami ataqqivarput'.

Kommuneqarfik Sermersuup pisortaanerata Steffen Ulrich-Lyngep oqaasiinut ima kattuffiit arfinillit qisuariaateqarput:

'Pisortaanerup tassani ilisimanngilaa isumaqatiginninniarsinnaatitaaneq qularnaateqanngitsumik isumaqatigiinniarsinnaatitaasut pigimmassuk. Tamanna nalornissutigigaanni isumaqatigiissutitut takussutissani qupperneq kingullermi takuneqarsinnaapput kikkut atsiorsimanersut.
Sulisut kattuffiisa akueraat kommuni sulisitsisutut aaliangiisinnaassuseqarmat taamaallaalli uparuarusullugu inatsisit isumaqatigiissutillu sinaakkutaasa iluanni pissammat.

Erseqqissaatigissavarput sulisut kattuffiisa Pingaarnertut Suleqatigiinnissamut Ataatsimiititap oqartussaaffii ataqqimmatigit, tassami isumaqatigiissut sulisut kattuffiisa kommunillu akornanni isumaqatigiissutaavoq.

KISIANNI Pingaarnertut Suleqatigiinnissamut Ataatsimiititap suliassarai tunngaviusumik malitassat sinaakkusiussallugit soorlu sulisoqarnermut politikkit taassuma ataani soraarsitsisoqassatillugu pingaarnertut malittassat, assersuutigalugu missangersuusiornernut, sipaarniutinut aaqqissuussaanermilu allannguiniarnernut tusarniaavigineqartussaalluni il. il.

Pingaarnertut Suleqatigiinnissamut Ataatsimiititaliaq inuit ataasiakkaat pineqartillugit AALIANGIISINNAASSUSEQANNGILAQ, tassanilu aamma soraarsitsiniartoqartillugu. Pingaarnertut Suleqatigiinnissamut Ataatsimiititaliap inuit ataasiakkaat pillugit suliaqarsinnaanngilaq.

Soraarsitsisoqarniartillugu ingerlatsinissamut pisinnaatitaaffimmi, funktionærlovemi, tjenestemandslovemi, sagsbehandlerlovemi aammalu Tunngaviusumik isumaqatigiissutini, sulinermut isumaqatigiissutit aammalu sinniisoqarnermut isumatigiissutini malittarisassanik allassimasoqarpoq suliassat qanoq ingerlanneqassanersut.

Inuit ataasiakkaat soraarsinniarneqarneri pineqartillugit Pingaarnertut Suleqatigiinnissamut Ataatsimiititaliami suliarineqassanngillat imaluunniit isumaqatiginninniutigineqassanngillat, taamaallaalli inatsisit sulinermillu isumaqatigiissutit malinneqassapput sulisup pineqartup kattuffia isumaqatigiinniarsinnaatitaasoq peqatigalugu.

Taamatut inatsisit atuuttut ilisimasaqarfiginnginneri imaluunniit malikkusunnginneri pillugit sulisuusut suliaminnik naqisimaneqaqisut qaavatigut nanertuutaasumik suliakkersuipput aammalu inatsisinit unioqqutitsisutut malersorneqarsinnaallutik, tamannalu kommunimut akisungaatsiarsinnaalluni.

Sulisut kattuffiisut isumaqatiginninniarsinnaasutut sakkortuumik Kommuneqarfik Sermersuumut inassuteqaatigaarput kommunalbestyrelsep piaarnerpaamik qulakkiissagaa, kommunip susassaqarfiini tamani soraarsitsiniarnermik ingerlatsiffiusuni, taakkunani suliaqartut inatsisit atuuttut, isumaqatigiissutit sulinermullu isumaqatigiissutit ilisimasaqarfigissagaat qulakkeeqqullugu ataqqeqqullugillu.

Kiisalu sulisut kattuffiisa kommunalbestyrelsi kajumissaarpaat Kommuneqarfik Sermersuup sulisullu kattuffiisa akornanni pitsaasumik oqaloqatiginnissinnaanermut sinaakkuseeqqullugu illuatungeriit tamarmik pisussaaffii ataqqineqalersillugit.

Neriuutigaarput siunissami pissarsiffiulluartumik aaliangersakkat atuuttut iluanni suleqatigiikkumaartugut.