EU tikeraaraat
Sermersooq EU-mi allaffimmut ilanngunniarpoq
Norddanmarks EU-kontorimik taagorneqartup Nordjyllandimi kommunit arlallit sinnerlugit Bruxellesimi sunniiniarneq isumagisaraa, Kommuneqarfik Sermersoorlu immaqa suleqatigiinnermut peqataalissaaq
Kommuneqarfik Sermersuumi Aningaasaqarnermut Ataatsimiititaq paasisassarsiorluni ulluni makkunani Belgiami Bruxellesimiippoq.
Europami illoqarfiit pingaarnersaannut angalanermi siunertaavoq, Norddanmarkimut EU-mi allaffeqarfimmiittumut Kommuneqarfik Sermersuup ilanngufferusutaanut tikeraarnissaq.
Sunniiniarneq
- Issittoq ukiuni makkunani Europami soqutigineqarluarpoq. Kommuneqarfik Sermersuumilu suliniutaasinnaasunik aningaasaliisussanillu nassaarniarnissamut tamanna atorluarsinnaanera neriuutigaarput, borgmesteri Asii Chemnitz Narup (IA), tusagassiuutinut nalunaarummi oqarpoq.
Norddanmarkip EU-mi allaffeqarfimmi Nordjyllandimi kommunit arlallit sinnerlugit Bruxellesimi sunniiniarneq isumagisaraa, immaqalu aamma Kommuneqarfik Sermersooq sinnerlugu qanittumi sunniiniartalernissaq.
Aningaasaqarnermut Ataatsimiititaq Norddanmarkimik EU-mi allaffiani naapeqarteqarnerata saniatigut aamma EU-kommissionenimi Europa Parlamentimilu sinniisunik naapeqateqartoqartussaavoq, Kalaallit Nunaanniillu EU-mi aallartitaqarfimmut pulaartoqassalluni.