Sermersooq Erhvervsråd: Nuna tamakkerlugu siuariartorneq

Sumiiffippassuarni aningaasaqarnerliorneq politikkikkullu nalunaarutit suliniutillu ingerlanneqarsimasut kiisalu suliffissaaleqinerujussuaq pissutigalugit Sermersuumi Inuussutissarsiornermut Siunnersuisoqatigiit mianersoqquseqqipput.

Pitsanngorsaasoqartariaqarpoq. Massakkut.

Taamatut tusagassiorfinnut nalunaarutikkut allappoq Sermersuumi Inuussutissarsiornermut Siunnersuisoqatigiit siulittaasuat Martin B. Shalmi.

Sermersuumi Inuussutissarsiornermut Siunnersuisoqatigiit siulersuisuisa pisariaqartutut isigaat, inuiaqatigiit pilersaarutit suliniutillu, siuariartornissamut ilimanartullit sammisariaqaraat, taamaasilluni suliniutit piffissaq sivikinnerusoq sivisunerusorlu isigalugit nunami tamarmi siuariartornermut suliassaqartitsinermullu ikiuutaassammata.

Siumut isigisumik

– Pisariaqarpoq siunissamut aningaasaliissuteqarnissaq, qanga pisimasut samminiaannarnagit. Aamma sullissinerup akikinnerulersinnissaanut aningaasaliisoqartariaqarpoq, attassiniartoqaannarani annertusaaniartoqaannaranilu. Ilangullugu pisariaqarpoq pisortat aningaasaliinerisa annertusarnissaa, assersuutigalugu inissialiornermi, sanaartornermi suliassaqartitsineq attatiinnarniarlugu, minnerunngitsumillu namminersortut aningaasaleerusussuseqarnissaat attatiinnarniarlugu, Martin Ben Shalmi oqarpoq, taanna isumaqarpoq aningaasarsiornerup nalinginnaasumik ingerlanerliornera pissutigalugu namminersortut annertunerusumik siuarsarneqartariaqartut.

Sermersuumi Inuussutissarsiornermut Siunnersuisoqatigiit katersuussimapput siulersuisut Tasiilami ataatsimiinnerannut atatillugu, tamatumanilu nunaqarfiit Kulusuk, Tiniteqilaaq Sermiligaarlu tikeraarneqarput.

– Siulersuisut namminneerlutik takusimavaat nunat allamiut takornariaqarnermik ingerlatsisuinit Tunu soqutigineqarluartoq, tamannalu nuannersuuvoq. Oqartussaasulli qulakkeertariaqarpaat malittarisassat tamarmik malinneqarnissaat, taamaasilluni ingerlatsisut nunat allamiut nunaqavissullu assigiissunik atugassaqassallutik, inuiaqatigiillu inuussutissarsiummit isertitaqarnissaannik qulakkeerneqassallutik, Martin Ben Shalmi tikkuaavoq.