Sermersooq eqqugaasunut millionit affaanik tunissuteqarpoq

Nunaqarfimmi Nuugaatsiami innuttaasut tassaarsuarmik eqqugaanerisa kingorna, Kommuneqarfik Sermersuumi Aningasaqarnermut Ataatsimiititaq aalajangerpoq 500.000 koruuninik tapiiniarlutik.

Karrata Kangerluani qaqqarsuup ilaata, arfininngornermi juunip 17-ianni unnukkut nakkaaneratigut, Nuugaatsiami illut aqqanillit tassaarsuarmik amusaaneranni inuit sisamat ajunaarput.

- Ajunaarnersuarmik taama annertutigisumik eqqugaasut ikiorserneqarnissaannik tapersersorneqarnissaallu pingaaruteqarpoq, taamaattumik nuannaarutigaara paasigakku aningaasaqarnermut ataatsimiititamit isumaqatigineqarnera, Kommuneqarfik Sermersuumi borgmesteri, Asii Chemnitz Narup tusagassiuutinut nalunaarummi oqarpoq.

Piffik annertuumik aserorsimangaatsiarpoq, nunaqarfimmilu innuuttaasut qaqugu angerlasinnaanerat suli ilisimaneqanngilaq.

- Avannaani kommuneqatitta suliassaat annertuupilussuusut ilisimavagut, tassami atortut kisimik ajoquserneqanngillat inuilli tarnimikkut timimikkullu ajoquserneri aamma annertuupiluussuusut ilisimallutigu.

- Nunaqarfiup Nuugaatsiap napparteqqinneqarnissaanut aningaasarpassuit atorneqartussaapput uangullu tunissutigut aningaasartuutissanut naleqqiullugit ikittunnguugaluartut taamaattoq pingaaruteqarpoq kommunitut ikioqatigiittarnerput takutissallutigu pingaaruteqartoq. Inuttaasut inuunerminni tunngaviginerpaasaminnik tassa angerlarsimaffimminnik, kammalaatiminnik ilaquttaminnillu annaasaqarnerisa kingorna taakku ilorraap tungaanut aallarteqqinniarneri imaannaagitsuusussaavoq. Taamaattumik tapiinitsigut takutinniarparput aaqqeeqataarusunnerput, Asii Chemnitz Narup oqarpoq.

Tunissutit 500.000 koruunit Qaasuitsup Kommunianut toqqaannartumik tunniunneqarnissaat Kommuneqarfik Sermersuumit aalajangerneqarpoq.