Kukkunersiuisut isorinninnerat
Sermersooq: Aningaasanik aqutsinerloqqinneq soraarsitsinermik kinguneqassaaq
Siunissami Kommuneqarfik Sermersuumi missingersuutitigut torinngitsuliornerit ´sulisutigut kineqartassaaq´, kommuni paasissutissiivoq, naatsorsuutigaalu 2014-imi 45 millioner koruuninik amigartooruteqassalluni
Nunatsinni kommunit inuttunersaanni, Kommuneqarfik Sermersuumi, aningaasanik aqutsinerlunneq ilisimaneqarluartoq pissutigalugu ukioq mannattaaq kommunip kukkunersiuisua Deloitte uparuaaqqippoq.
Deloittep naatsorsuutit akuersissutigigaluarpai taamalu atsiorlugu naatsorsuutit eqqortumik takussutissiisut, tamannali peqatigalugu immikkoortut 13-it pitsanngorsaavigisariaqartut tikkuarlugit.
Ima annertutigisimapput, Sermersooq aalajangerluni siunissami missingersuutitigut tukattoqarnera ´sulisutigut kinguneqaateqartassasoq´.
– Ajornartorsiut isumaginialereersimavarput iluarseeqqinnermut pilersaarutitsinni, missingersuutinut malittarisassatsigut aammalu Ingerlatsinermut Aningaasanillu Aqutsinermut Ilitsersuummi nutaami, siunissami sulisut tamarmik malitassaanni, kommunip aningaasaqarnermut pisortaa Lars Møller-Sørensen paasissutissiivoq, ingerlaannarlu pitsanngortoqarnissaanik neriorsuinissaminut mianersorpoq.
– Tukanneq maanna atugarput Nuup Kommunianeersuuvoq. Taamaattumik neriorsuisinnaanngilanga 2015 sioqqullugu kukkunersiuinermi uparuagassartaqartassanngitsugut, taanna tusagassiorfinnut nalunaarutikkut itisiliivoq, naliliivorlu Kommuneqarfik Semersooq 2014-imi 45 millioner koruuninik amigartooruteqassasoq.
Siuariarnerit annikitsuinnaat
Kommuneqarfik Sermersuup borgmesteriata Asii Chemnitz Narupip, Inuit Ataqatigiit, nassuerutigaa kommuni suli unammisassaqartoq.
Tamanna suli ersarinnerulerpoq sisamanngormat aningaasanut ataatsimiititaliap ataatsimiinnerani kukkunersiuisut allakkiaat eqqartorneqarmat, borgmesterilu malillugu ataatsimiititaliami ilaasortat tamarmik ´pakatsisimapput´.
– Ukiuni kingullerni arfinilinni politikkikkut nukippassuit aningaasaqarnermut atorsimavagut. Taamaattumik pakatsinaqaaq annikitsuaraannarnik siuariartoqarsimammat, Asii Chemnitz Narup oqarpoq.
Torinngitsuliortoq soraarsitaassaaq
Kommunip kukkunersiuisut allakkiaannut akissutaanni allassimavoq siunissami torinngitsuliorneq akuerineqartassanngitsoq.
´Siumut isigisumik assersuutigalugu ingerlatseriaatsit malinneqannginnerinut atatillugu tamanna sulisutigut kinguneqaateqartassaaq´, akissummi allassimavoq.
– Ilaatigut aningaasanik aqutsinerlunneq, kalaalimineerniarfimmit naatsorsuutit amigaatigineqarnerat aammalu naatsorsuusiornermut missingersuusiornermullu malittarisassanik malinninnginnerit kukkunersiuisut uparuarsimavaat, borgmesteri paasissutissiivoq.