Sermeq Nuup Mittarfiata ingerlanneqarneranut akornutaasoq

Nuummi timmisartumik angalaniartunut marlunngornermi pingasunngornermilu kinguaattoornermik eqqorneqarsimasunut nuanngitsumik nutaarsiassaqaqqippoq.

Mittarfeqarfiimmi maanna nalunaarutigaat timmisartut Nuummut mikkiartornerannut sumiissusersiut localizerimik taaguutilik sermeqarpallaarnera pissutigalugu ingerlanngitsoq.

- Tamatuma kingunerisaanik timmisartuussinerit arlallit taamaatinneqarsinnaapput, timmisartut utertarsinnaapput aammalu silap isikkivilunnera putsullu pukkipallaarnerat pissutigalugu timmisartorneq sivisunerusinnaavoq, Mittarfeqarfiit taama nalunaaruteqarput.

Kitsissuniit mikkiartortassapput
Localizerip sermersimanera pissutigalugu sila isikivilutsillugu putsullu pukkitsillugit timmisartut Kitsissut qulaallugit mikkiartortariaqartarput, timmisartut uuttuutaat atorneqarsinnaatinnagit mikkiartornermi paasissutissanik tigooqqaaneq Kitsissuni antenne aqqutigalugu pisariaqartarmat.

- Localizerip atorneqarnissaanut taarsiullugu uuttuutit atorlugit timmisartut mikkiartorneranni isikkivik pitsaanerusariaqarpoq putsullu portunerusariaqarlutik. Tamanna piffissap timmisartorfiusup sivisuneruneranik, timmisartuussinernik taamaatitsinermik imaluunniit timmisartut uternerinik kinguneqarsinnaavoq, Mittarfeqarfiit allapput.

Sermeq 2 meterisut issutigisoq
Sermeq teknikkikkut atortunut akornutaasoq Quassussuup saavani tatsimeersuuvoq. Tatsip imaa sermip iluatigoorluni mittarfiup tungaanut kuuppoq. Tassani qerisarpoq, tamatumalu kingunerisaanik sermeq alliartortarpoq.

Mittarfeqarfiit naliliinerat malillugu sermeq 25.000 kubikmeterinik annertussuseqarpoq.

- Sermeq Localizer-ip maligaasaanut akornusersuisoq allisimavoq issutsissimallunilu. Sumiiffinni amerlasuuni sermeq 2 meterit tikillugit issussuseqarpoq. Sermip iluatigut erngup kuunnerani qerisarneranilu sermeq suli issutsikkiartorpoq. Siornatigut sumiiffiup taassuma sermernera takusaraluarparput, kisiannili aatsaat sermip taamak annertutigisumik issutsikkiartuinnarnera aatsaat takuarput, Nuummi mittarfiup pisortaa Jimmy Gudmandsen nassuiaavoq.

Quassussuup tasianiit erngup kuuffiata aasamut allanngortinneqarnissaa pillugu Mittarfeqarfiit kommuni oqaloqatigaat, maanna erngup kuuffia ajoraluartumik antennit saavanni sermimik annertusiartortitsisarmat.

Mittarfeqarfinniit aamma Air Greenlandimiit angalasartut eqqugaasartut utoqqatserfigineqarput.

Assit ataani kortimi sermeq sumiinnersoq takujuk