Sila

Seqernup nueqqittalernera silasiortunut ilaqutaavoq

Ilulissani qaammatini marlunni kaperlareersimalluni Seqineq nueqqittalerpoq. Qaamaneq tikilluaqquneqarpoq - illoqarfimmiunit aammattaarli silasiortunit - tassami suliaat piuminarnerulissapput

Silasiortut atortoriniartagaat pissanganartorujussuarnik immikkoortortaqarput. Kalaallit Nunaanni silasiornermi satellit-it atortuni pingaarnersaapput. Issittup qulaani satellit-init assilisat silasiortunut iluaqutaasartorujussuupput, assersuutigalugu pujornissaanik putsulluunniit appasinnissaanik ilisimasaarisoqassatillugu.

DMI-p silasiortarfianik Kangerlussuarmi atuisoq pingaarnerpaaq tassaavoq Air Greenland. Silasiorfiup ilaatigut Kalaallit Nunaanni mittarfinni tamani silasiornerit isumagisarpai. Silassamik ilamasaarutit tamakku piffissamut sivikitsuinnarmut ilimasaarutaasarput - pingaartumillu ulluuneranut atuuttarlutik. Nunamili silasiornermi atortut killeqaqimmata satellit-imit assit silasiornermi pingaaruteqarput.

Ukiukkut ullup qaamanera sivikittarpoq

Ukiukkut ullukkut qaamasarnera sivikitsuusarpoq, infrarød-imillu assilisat iluaqutigilluarneqartarput. Ullukkulli qaamanerani assilisat piumaneqarnerusarput, maannalu januaarip qiteqqunnerani qaammariartornera silasiortunut iluaqutaajartulerpoq.

Nunatta kujataa sivisunerusumik seqinnertalerpoq. Pingasunngormat januaarip 14-ianni ullup qeqqata missaani saetellit-ikkut assilisap tallerpia'tungaani pujoqassusia, Kujataanilu ulluunerani nuna apisimasoq takuneqarsinnaapput.

Januaarip 19-ianni Kangerlussuarmi seqineq nueqqissaaq, nunaqarfiullu kujataa'tungaanit qaqqanit nuissaaq. Tamanna cafeteriami tequila sunrise-mik nalliussineqartarpoq.

Marlunngornermili januaarip 13-ianni Iluliaramiut seqinniareerput.

"Seqineq qaammatini marluk missaanni peqanngereerluni ullumi nueqqippoq. Illoqarfiup qaqqap qaavani katersuupput. Qaamaneq immikkorluinnaq ittuuvoq, taamatuttaaq issinnera - 23-nik issikkami panertumik annernartumik anorlerluni", Ilulissaneersoq Bo Normander, assimik kusanartumik assiliisimasoq, oqaluttuarpoq.

Allaaserisaq una DMI isumaqatigalugu ilanngunneqarpoq. Oqaluttuaq dmi.dk-mi ilanngunneqarsimavoq, Mogne Røbbnebek-imik allanneqarsimasoq. dmi.dk-mi ilanngunneqarsimavoq 15.01.15-imi

Powered by Labrador CMS