Septembarimit atuutilersussamik misileraammik qaleralittassiisoqarpoq
Pilerngullugit qaleralittassat nungupallapput, maanna Naalakkersuisut immikkut misileraammik 700 tonsinik qaleralittassiipput - qaammatinut sisamanut agguarneqartunik
Ukioq manna Qerqertarsuup Tunuani qaammatikkaartumik qaleralittassiisarneq qimallugu pilerngutassanik pisassiisoqartalermat amerlasuut ersissutigisaaattut pisoqarpoq. Pisassat nungunneqapallapput, aggustimilu aalisagassaaruppoq. Pisassat ukioq naallugu atasussaagaluartut. Taamaasillunilu aalisartut aningaasaataarupput tunitsiviillu uninngaannalerlutik.
Naalakkersuisulli maanna aalajangerput ukiup sinneranut qaleralittassanik misiliutitut pisassiissutitut taaneqartunik 700 tonsinik pisassiiniarlutik. Pisassat taamaallaat umiatsiaaqqanut 6 meterit inorlugit angissusilinnut pisassiissutaapput, aalisarnerlu Qeqertarsuup Tunuani sumiiffinni aalajangersimasuni ingerlanneqassaaq. Pisassaat qaammatikkaartumik septembarimit novembarimut 200 tonsiupput. 100 tonsit decembarimi pisassiissutigineqarput.
Piumasaqaateqarporli. Aalisarneq pissaaq Pinngortitaleriffik qanimut suleqatigalugu. Aalisarnerlu naallugu logbogimut allattuisoqassaaq, pisat tamarmik nalunaarsorneqassapput nunamukaanneqassallutillu. Tamatuma saniatigut qalerallit angissusaannik uuttortaasoqassaaq.