Se billeder: Nipilersornermik Ilinniarfiup ukiortaami tusarnaartitsinera ulikkaavilluni inoqarpoq

Inissat tamakkerneqarput qularnanngitsumillu qullipittoqalaarluni, nipilersornermik ilinniarfik akunnerni marlussunni pisarnertut Katuami ukiortaami tusarnaartitsimmat. Inissat tamakkerneqarsimapput, nipilersukkallu ullutsinneerlutillu qangameersuupput.
Tusarnaartitsineq aallarnerneqarpoq, inersuaq taartuinnaq taamaallaat qilaatersorpalaannguaq tusarsaalluni. Qilaatersorneq ingiorlugu erinagilluaqalutik Qupannavaat appipput nipilersoqatigiissuarnik Nuuk Byorkesterimit naggaataatigut ingiallorneqarlutik erinaq pikkunarsisillugu ulloq nipilersorfiulluaqisoq aallarnerpaat. Erinaq siulleq ateqarpoq Qilaat, Arnannguaq Gerstrømmimit sananeqartoq. Erinaq tunumiut qilaatersoriaasianit erinarsoriaasiannillu isummersorfigineqarsimavoq ilaatigullu Savalimmiuni, Danmarkimi, Venezuelami nunatsinnilu illoqarfinni arlariinni tusartinneqareersimalluni.
Tullinnguullugu erinarsoqatigiit Qupannavaat, tusarnaariat tamarmik peqatigalugit, ukiumut nutaamut aallarniutitut tulluaqisoq ”Nalliulluaqqunaq” atorpaat.
Taakkualu kingorna erinnat klassisk-iunerusut assigiinngitsut aamma tusartinneqarput, ilaatigullu kisimiikkaarlutik qarlortaatit assigiinngiiaat nuannivissumik atorneqarlutik. Erinniaq ”Avannarliit” ilisaritinneqarpoq Arnannguaq Gerstrømmimit aamma suliarilluarneqarsimasoq. Erinniarsuaq ”Elvira Madigan” Nadia Thybo Jensen lancier-solistiliullu nipilersorneqarpoq. Qarlortaat cornet atorlugu Kristin Isholm jazzerpalaartumik nuannivissumik tusarnaartitsivoq kiisalu Lars Andersennip qarlortaassuaq tuba atorlugu ”Skovtrolden” (torullik orpippassuarmioq) appisimaarlugu. Mike F. Thomsen unnummi ataqatigiissaarisuullunilu akunniliisartuunermi saniatigut erinaq ”Når du ser et stjerneskud” nammineq kalaallisuunngortissimsani erinarsorpaa.
Tusarnaartitsineq nagillugu nipilersoqatigiit meerartaat isaatinneqarput. Meeqqat inequnaqalutik kalaallit erinaataannik atuisaarput ilinniartitsisortik Christof Schreiber aqutturalugu. Tupinnaannartumillu nipilersortartut 70-iullutik scene ulikkaavillugu appisimaarfigaat.
Nutaatut NBO Band aammalu MI Band isilaritinneqarput taakkulu rock-inik pop-inillu qiimmaallatsitseqalutik nipilersorput.
Ukiortaami tusarnaartitsinermut tusarnaariat nuannisavissorput, erinarsoqataasarlutillu ”Maniitsuliarluta” qitippaat. Tusarnaariat peqatigalugit erinnat ”Iggo” aammalu ”Land of Hope and Glory” Mike F. Thomsennip kalaallisuunngortissimasaa erinarsoqataaffigaat. Minnerunngitsumillu pulaartitut erinarsortoq Per Berthelsen nammineq erinniani ”Timmissatut ilillunga” aamma tusartillugu.
Ukiortaami tusarnaartitsineq aaqqissuulluangaaqisoq nuannersumik naammasineqarpoq. Tusarnaariat ersaattaarujussuarput, erfalasunillu tamangajavimmik aalateralutik naggataatigullu qillalasorpassuarnik qummoroortitsinermik naggaserneqarluni.
Nipilersoqatigiit aqutsisuat Arnannguaq Gerstrøm, siuttuulluni nipilersornermik ilinniartitsisaleramili tusarnaartitsinerit malunnartumik pittanngoriartornerat takuneqarsinnaallunilu tusaaneqarsinnaavoq. Arnannguaq musikkonservatoriami ilinniarnikuuvoq aammalu nammineq meeraanermini Nuuk Byorkesterimi aallartinnikuulluni.
Tusarnaartitsineq Nipilersornermik ilinniarfiup aqutsisuata Arnannguaq Gerstrømmip aaqqissuussarivaa. Peqataasut makkuupput: Nuuk Byorkester, Nuuk Begynderorkester BO, Tambourkorpset, NBO Band, MI Band (Meeqqat Illuat Band), Nuuk Byorkester Ensemble, Lancier Ensemblet, Orkesterkoret Qupannavaat kiisalu pulaartitut nipilersoqataasut Danmarkimiit Islandimiillu peqataallutik.