inerteqqut

Savissivimmi imigassamik nioqquteqartoqarunnaartoq

Nunatsinni nunaqarfiit avannarpasinnerpaasa ilaanni ullumikkumiit imigassamik aalakoornartulinnik nioqquteqartoqarunnaartoqarpoq

Savissivimmi imigassamik aalakoornartulimmik nioqquteqarneq unitsinneqarpoq

Savissivimmi Qaanaamit kujammut 200 kilometeritut ungasissusilimmiittumi ullumikkuminngaanniit imigassanik aalakoornartulinnik nioqquteqarneq taamaatinneqarpoq.

Nunaqarfik ukiormanna januaarip qaammataani tamanna pillugu innuttaasunik taasititsivoq, tassanilu 21-t imigassamik nioqquteqarnerup taamaatinnissaanut akuersipput, aqqaneq-marluk akerliullutik.

- Nalaakkersuisut toqqarsimavaat nunaqarfimmi Savissivimmi imigassamik aalakoornartortalimmik nioqquteqartarnerup unitsinneqarnissaanik kissaateqarneq malissallugu, peqqissutsimut naalakkersuisoq, Agathe Fontain (IA) oqarpoq.

Atuaruk: Imigassap inerteqqutaalernissaa isumaqatigiinngissutaasoq

Meeqqanik sumiginnaaneq
Piffissami sivisuumi nunaqarfimmi imigassamik atornerluineq ajornartorsiutaasimavoq. Tamanna meeqqat akornanni toqqissisimanngitsitsiinnarnani, aamma angajoqqaat imeraangata sumiginnaanermik kinguneqartarpoq. Meeqqallu eqqarsaatigalugit innuttaasut eqimattat taasititsinissamut iliuuseqarsimapput.

Atuaruk: Nunaqarfimmi imerneq ajornartorsiutaasoq

Piffissami atuineq annertusoq
Taasinerup kingorna kommunalbestyrelsimit Naalakkersuisunut Savissivimmi imigassamik aalakoornartortalimmik nioqquteqartarneq inerteqqutaalissasoq inassuteqaatigineqarpoq.

Savissivimmi piffissap ilaani annertuumik imigassartortoqartartoq ilisimaneqartoq kommunip oqaatigaa, tamatumalu ajornartorsiutaanerata meeqqat ukiukitsut angajoqqaaminnit sumiginnarneqarsinnaanerat kingunerisaraa

- Imigassamik aalakoornartortalimmik nioqquteqartarnerup unitsinneqarnissaanik kissaateqarneq nunaqarfimmi meeqqat ilaqutariillu atugarissaarnerulernissaannik tunngaveqarpoq. Taamatut kissaateqarneq tapersiinnarsinnaavarput, Agathe Fontain (IA) oqarpoq.

Qaanaami aamma nunaqarfinni eqqaaniittuni allani imigassamik aalakoornartulinnik tuniniaanermut inatsisit allanngortinneqanngillat.

Powered by Labrador CMS