Saviminikut Danmarkimut aallarunneqarput
Containerit marluk saviminikunik ulikkaartut sapaatip akunnerani uani Sisimiunit Danmarkimut aallarunneqarput. Taakku siulliupput sineriammi eqqaavinni saviminikut aallarussuunneqarnissaannik suliniummi.
Suliniut Sisimiuni Maniitsumilu aallartinneqarallarpoq, siunertaavorli Kalaallit Nunaannut tamarmut siaruaatinnissaa, knr.gl allappoq knr.gl.
- Sisimiuni Maniitsumilu misilittakkat katersorneqassapput. Tassa containerit qanoq pitsaanerpaamik immerneqassanersut qanorlu annertutigisumik immerneqassanersut akilersinnaanissaminnut. Ilisimasaq tamanna kommuninut nalunaarutitsigut siammarsarneqassaaq, suliniummi pisortaq KANUKOKA-meersoq Zenica Gosvig Larsen oqarpoq.
Neriuutigineqarsimagaluarpoq saviminikunik aallarussuineq aningaasatigut sinneqartooruteqarfiussasoq, tamannali maanna saviminikut akii pissutigalugit piviusorsiorpalaanngilaq.
- Saviminikut Danmarkimi maanna akiat pissutigalugu piviusorsiorpalaarneruvoq assartorneqarnerat akilersinnaassasoq. Tassa imaappoq, saviminikut Kalaallit Nunaanni passunneqarnerat kommuninut aningaasartuutaassaaq, Zenica Gosvig Larsen oqarpoq.
Suliniut aappaagu aasarnissaata tungaanut ingerlassaaq, kommunillu namminneq aalajangissavaat ilisimasat katersorneqarsimasut atorusunnerlugit.