Aalisarneq
Savalimmiut suleqatigiikkumajunnaarneq iluanaarutigaat
2016-imi Savalimmiut aalisakkanik avammut niuernerutigisartagaasa sisamararterutaat Ruslandimut niuerutigineqartarput.Hagstova Føroyaminngaanneersut (Savalimmiuni Naatsorsueqqissaartarfik) kisitsisit kingulliit takutippaat.
Ukiuni kingullerni Savalimmiut aalisakkanik avammut niuernerminni Ruslandi iluaqutigilersimavaa. Hagstova Føroyaminngaanneersut kisitsisit kingulliit takutippaat, kapisillit, makrelit ammassassuillu Ruslandimut niuerutigineqarnerannut 1,9 milliardinik koruuninik naleqartut. Savalimmiut aalisakkanik avammut niuerutigisartagaasa sisamararterutaat.
Ruslandimut niuernerup saniatigut USA aamma niuerfigineqartarpoq 900 millionillu koruunillu isertissutigineqarsimallutik. Tuluit Nunaat pingajuuvoq Danmark Kinalu tulleralugit.
Savalimmiut avammut niuerutigisartagaat 8 milliardiupput taakkunanngalu aalisakkanik isertissutigineqartartut 7,6 milliardiullutik.
Kapisillit akisunerulernerat
Avammulli niuertarnerup milliardid affaanik qaffannera 2015-mut sanilliutissagaanni kapisilik akisunerulersimavoq.
Kapisilik avammut niuerutigisarnerata nalinga 31 procentimik qaffariarsimavoq aningaasanngorlugu 862 millioninik koruuninik naleqarluni. Kapisilik avammut niuerutigineqarnermini 3,7 milliardinik koruuninik naleqarpoq, aalisakkanimmi avammut niuerutigineqartartuni kapisilimmut isertissutaasimasut affaata missaaniipput.
Suleqatigiikkumannginneq periarfissiivoq
Savalimmiut Ruslandi niueqatigisareerpaat ukiunili kingullerni aatsaat taama aalisakkanik niuertoqartigaaq.
2014-imi EU-p aalisakkat Savalimmiuneersut makrelit saqitsaassutigineqarneranni aallartippoq, Savalimmiummi niuerfissanik nutaanik ujarlertariaqalersimapput. Tamatuma kingunerisaanik EU Ruslandilu suleqatigiikkumajunnaarnikuupput.
Suleqatigiikkumajunnaarnerillu nalaani Ruslandi aalisakkanik nunanit allaniit pisariaqartitsisimavoq Savalimmiulli toqqarneqarluni.
Eqqaasitsissutit
Savalimmiut aallaqqaammut danskit naalakkersuisuannit EU-p Ruslandillu suleqatigiikkumajunnaarnerat atorluaqqunagu eqqaasissutigineqartarsimavoq.
Ruslandi inuussutissanik EU-mik suleqatiginnikkumajunnaarpoq, Savalimmiulli Ruslandimut aalisakkanik niueqateqartarnertik EU-p suleqatiginnikkumajunnaarneranut atorluaanertut isiginngilaat.