nunanut allanut tunngasut
Savalimmiut Schengenimi ilaasortaaginnarusuppoq
Schengen pillugu isummertoqaqqaartinnagu nunanut allanut oqartussaqarfik Savalimmiunit akisussaaffigineqalersinnaanngilaq. Tamanna Savalimmiormiut lagmandiat Helle Thorning-Schmidtimut nalunaarutigaa
Savalimmiuni naalakkersuisooqatigiit nunanut allanut oqartussaqarfik tigunissaa ilaatigut naalakkersuisooqatigiinnissamik isumaqatigiissuteqarput. Oqartussaqarfilli tiguneqarnissaa kinguaattoorsinnaavoq, Savalimmiunimi oktobarimi qinersisoqassaaq.
- Savalimmiut Schengenimut isumaqatigiissummut peqataanissaa siunnertarineqarpoq. Taanna aalajangiuteriarpat oqartussaqarfik angerlaanneqarsinnaavoq, statsministerimik ataatsimeeqateqareernermi kingorna lagmandi Kaj Leo Holm Johannesen oqarpoq.
- Statsministerip ataatsimeeqatiginerani isumaqataavoq Savalimmiut Schengenimi ilaasortaaginnarnissaa pillugu, oqarpoq.
Marsip aallartinnerani aalajangiinissaq
Inatsisinut atuutitsinermut ministeriaqarfiup Schengenimik isumaqatigiissut suliaraa, februarimi marsimiluunniit naammassineqarnissaa lagmandip naatsorsuutigaa.
- Nunanut allanut oqartussaqarfiup angerlaanneqarnissaa qanoq naleqassanersoq nalunaarusiami paasinarsissaaq. Schengenimik isumaqatigiissut qulakkeeqqaarlugu aatsaat oqartussaqarfik angerlaatissavarput, Kaj Leo Holm Johannesen naqissusiivoq.
Qimarngusut sullinneqalersinnaasut
Lagmandip ukiortaamini oqalugiarnermini oqaatigaa Savalimmiut qimarngusunik ikiuisalertariaqartoq. Ilaqutariit 50-60-t ikiorsinnaallugit aamma oqaatigaa.
- Qimarngusunik ikiuinissatsinnut suli piareersimanngilagut. Savalimmiunili oqallisigineqarnissaa pingaartippara, oqarpoq.
Qimarngusunik ikiuiniaannarluni nunanut allanut oqartussaqarfik tiguneqartariaqanngitsoq statsministerimit oqarfigineqarpoq.
Savalimmiut qimarngusunik ikiuisalissappat Danmarki sapinngisani tamaat ikiuutaassasoq statsministerimit aamma oqaatigineqarpoq.