Aalisarneq
Savalimmiut Nunatsinni talittarfitoqqami torersaassiniarput
Savalimmiormiut naalakkersuisuisa siulittaasuat, Aksel V. Johannesenip, Naalakkersuisut siulittaasuat, Kim Kielsen (S), Kangerluarsorusermi talittarfitoqqami torersaassinissamut periarfissat misissussallugit neriorsorpaa
Kim Kielsenip qanittukkut savalimmiormiut naalakkersuisuisa siulittaasuannut pulaarnermini Nuup kujataani Kangerluarsorutsimi talittarfikoq oqaluuseraa.
Kangerluarsorutsimi talittarfik 1990-ikkut aallartinnerannili atorneqarunnaarpoq, illullu maanna aserfallannikuupput.
- Savalimmiormiut Kalaallit Nunaanni aalisarnikorujussuupput, kisianni suli illukoqaqaaq kalaallit uumigisaannik. Taakku peerneqqartariaqarput, Kim Kielsen, Savalimmiormiut aviisiannut Sosialurinimut oqarpoq.
Siulittaasup suliaq qaqissavaa
Kringvarp Føroyamut (Savalimmiormiut radio- aamma tv-eqarfiat, aaqq.) Aksel V. Johannesen oqarpoq, Kim Kielsenimik naapitsinermini suliaq qaqinniarlugu neriorsuisimalluni.
Siullermik Savalimmiormiut naalakkersuisuisa siulittaasuata inatsisartunik aamma inuussutissarsiortunik Nunatsinniinnikunik suliaq oqaloqatigiissutiginiarpaa, kingornalu kalaallit oqartussaannik.
- Savalimmiormiut kalaallit pissarititaannik aamma tikilluaqqusinerannik Kalaallit Nunaanniinnerminni iluaquteqarluarnikuupput. Taamaattumik oqaatigineqarsinnaavoq, illut uagutsinnut Savalimmiormiunut kanngusuutaasut, atoriikkatsinnik saliisimannginnerput pissutigalugu. Isumaqarpunga kalaallit iliuuseqarfigisariaqarigut, Aksel V. Johannesen oqarpoq.
Talittarfik savalimmiormiunut pingaartuusimasoq
Savalimmiormiut naalakkersuisuisa siulittaasuata aamma ilisimatitsissutigaa, maannakkut illut kiap piginerai ilisimanagu.
Færingehavn (Kangerluarsoruseq, aaqq.) Nuup kujataani 50 kilometerisut ungasitsigipajaartumiippoq. Taanna 1927-imi Savalimmiormiut Kalaallit Nunaanni aalisarsinnaatitaalermata pilersinneqarpoq. Talittarfik 1937-imi nunani tamalaani aalisartut talittarfittaraat.
Avannaani annertusaanerit
Napparsimmaviliortoqarpoq, radioqarfiliortoqarpoq aamma aalisakkanut tarajorteriviliortoqarpoq.
Atuaruk: Sea Shepherd ukioq manna Savalimmiunukassanngilaq
Nordafar 1953-imi, Qallunaat-Savalimmiormiut-Norskit ingerlatsivigisimasaat, aalisarfimmik ingerlatsinissamik akuersissummik pissarsivoq. Ingerlatsivik niuernikkut aamma suliffissualiornikkut pisinnaatitaaffeqalerami ilaatigut arlalinni aalisakkeriviliorpoq, uuliaasiviliorpoq, sømandshjemiliorpoq aamma 230 meterinik tulattarfiliorpoq.
Atuaruk: Savalimmiut oqartussaaffik alla tigussavaa