Fiskekrig

Savalimmiut: Naalakkersorneqassanngilagut

Aalisagaativut EU-mut tunisinnaanngikkutsigit allamut tuniniassavagut, savalimmiuni aalisarnermut ministeri oqarpoq

EU Naalagaaffeqatigiinnit pingaarneruva. Taamatut savalimmiormiut aperipput, EU-p qallunaat peqqulermagit Savalimmiuni aalisarnermut pillaateqassasut.

Savalimmiut makrel-iutitik nunanut allanut, EU-mut ilaasortaanngitsunut, tuniniartalerniarpai EU-p aalisarnermut kommissæria Maria Damanaki pillaateqarnissamik ilimasaarimmat Atlantikup avannaani makrel-inik aalisarnermi aaqqiagiinngissutip aaqqiivigineqarnissaa neriuutigalugu.
Tassami pillaanikkut ajornartorsiut qaangerneqarsinnaanngilaq, Savalimmiuni aalisarnermut ministeri Jacob Vestergaard isumaqarpoq.
– EU isumaqatigiinniarnissamik soqutiginninngilaq. EU pillaassutinik aallartitsinissaminut imminut tunngavissarsiorsimavoq. Isumaqarput pinngitsaaliilluni aaqqiissuteqartitsisoqarsinnaasoq.
– Aalajangiusimavarput savalimmiut imartaanni makrel-erniarsinnaalluta, tamannalu kimilluunniit aalajangerneqassanngitsoq, Jacob Vestergaard Ritzau-mut oqarpoq.
Aaqqiagiinngissutaavoq Islandip Savalimmiullu Atlantikup avannaani pisassaminnik namminneq aalajangiisimanerat.
Pisassalli amerlavallaanut aalajangerneqarsimapput, aalisarnermut kommissæri oqarpoq. Akerlianik savalimmiuni ministeri isumaqarpoq pisassat pissusissamissut amerlassuseqartut.
– Nutaamik agguaassisoqarnissaanik Savalimmiut piumasaqaataat sumiginnarneqarsimavoq. Taamaattumik pisassissimavugut savalimmiut imartaani aalisagaqassusianut naapertuuttutit isigisatsinnik, taanna oqarpoq.
Maria Damanaki EU-p Islandimut Savalimmiunullu pillaateqarsinnaaneranut piareersaataasunik sulilerpoq. Tamanna kinguneqassaaq pillaatissanut siunnersuummik, pilersaarutillu malillugit taanna sapaatip akunnerata ingerlanerani saqqummiunneqassaaq.
Aalisarneq Savalimmiuni inuussutissarsiutit pingaarnersaraat, niuernerullu ilarujussua Danmarki aqqusaarlugu pisarpoq.
– Avammut tuniniakkatta ilarujussui Danmark aqqutigalugu tuniniartarpavut. Pissutsit eqqumiitsunngussapput umiarsuavut qallunaat umiarsualiviinut tikeqqusaajunnaassappata, EU-lu Naalagaaffeqatigiinnit pingaarnerutinneqarpat.
– Pissutsit taamaasinerisigut unammilligassaqalerpugut, EU-lli avataani silarsuaq angeqaaq. Tunisartakkatta ilarpaalui nunarsuarmi sumiiffinnut allanut tunisareerpavut, Jacob Vestergaard oqarpoq savalimmiormiullu aalisagaataannik tuniniaaviit Kina, Japan, Nigeria Ruslandilu tikkuarlugit.

Powered by Labrador CMS