Overfiskeri

Savalimmiut EU eqqartuussivilersuuppaa

EU-p Savalimmiunut aalisarnermik pillaateqarnera WTO-mi misilinneqassaaq, Savalimmiuni aalisarnermut ministeri oqarpoq

Danmarkip Savalimmiut piginnaatippaa nunarsuarmi niueqatigiiffimmut WTO-mut EU-p unnerluutiginissaanut.

Aalisarnermik sorsuutiginninneq pissutigalugu Savalimmiuni aalisartut EU-mi umiarsualivinnut tikeqqusaanngillat. Danmarkilli Savalimmiut piginnaatippaa EU nunarsuarmi niuernermik ingerlatseqatigiiffimmut WTO-mut tunniussinnaagaa, paasiniarlugu pillaassutit unioqqutitsinerunnginnersut.
Piginnaatitsissullu taanna Savalimmiut atorniarpaat, Politiken malillugu savalimmiuni aalisarnermut ministeri Jacob Vestergaard oqarpoq.
– Sapaatit akunnerini aggersuni piginnaatitsissut atorniarparput. Tamanna sivisuumik piareersarsimavarput maannalu taamaasiorsinnaalerpugut, Jacob Vestergaard Politiken-imut oqarpoq.
Aamma atuaruk: Savalimmiormiut EU eqqartuussivilersuunniarpaat
Aalisarnermik sorsuutiginninnermi pineqarpoq Savalimmiut makrel-inik ammassassuarnillu pisassatik qaffassimammatigit, atlantikup avannaanut sineriallit nunat allat isumaqatigiissutaat unioqqutillugu.
Tamanna pissutigalugu EU Savalimmiunut pillaatissanik eqqussivoq, qaammatip ataatsip missaani atuussimalersunik. Pillaatit kingunerisaannik nunat EU-mut ilaasortat savalimmiormiut aalisagartaannik eqqusseqqusaanngillat.
Taamaattumik piffissami kingullermi Savalimmiormiut aalisartut aalisagartatik Ruslandimut, Asiamut Afrikamullu tunisarpaat, savalimmiuni aalisarnermut ministeri paasissutissiivoq.
Savalimmiut qallunaat piginnaatitsinissaat naatsorsuutigisimavaa, Jacob Verstergaardilli nassuerutigaa aalisarnermut tunngasukkut Danmarki eqqumiitsumik inissisimalersimasoq.
– Pissutsit eqqumiitsorujussuupput Danmarki EU-mut ilaasortaammat, maannalu periarfissiilluni EU-mik eqqartuussivikkoortitsinissatsinnut, taanna oqarpoq.
Ministeriunerup Helle Thorning-Schmidtip siusinnerusukkut erseqqissarsimavaa EU-p pillaatai malissallugit Danmarki pisussaaffeqartoq, Naalagaaffeqatigiittoqaraluartoq.

Powered by Labrador CMS