inuit amerlassusiat
Savalimmiut aatsaat taamak inoqartigisoq
Savalimmiuni inuit maanna 50.000-it sinnerpaat. Savalimmiuni siornatigut 50.000-it sinnerlugit inoqarnikuusimanngilaq.
Savalimmiuni naatsorsueqqissaartarfiup Hagstova Føroyap nittartakkaminni nutaarsiassanik nutaanik ikkussigaangamik kisitsisit qaffassimasarput. Taamaappoq aamma inuit amerlassusaat pineqartillugit.
Hagstova Føroyap kisitsisit saqqummersitai naapertorlugit Savalimmiuni innuttaasut apriilip aallaqqaataani 50.030-upput.
Kisitsit 50.000 ukiuni kingullerni angujuminaassimavoq qaangerneqarnissaalu angakkuarnikkut aatsaat anguneqarsinnaasutut isigineqartaraluarluni.
Oqaatigiuminaattoq
Hagstova Føroyap nittartakkatigut quppernernermini innuttaasut amerliartornerat ingerlaannassanersoq oqaatigisinnaanngilaat. Ukioq 1985 aallarnerfigalugu innuttaasut amerlassusaat, inunngortartut kisitsisaat, toqusartut kisitsisaat kiisalu nuuttut kisinneqartalerput.
- Kisitsisaatigut malillugit innuttaasut amerliartornissaat ikiliartoqqinnissaallu oqaatigisinnaanngilarput. Kisitsisit takutippaat Savalimmiut nunallu allat akornanni nuuttarnerit apeqqutaassasut, Hagstova Føroya paasititsivoq.
Amerliartornermut peqqutaasut marluk
Savalimmiuni innuttaasut amerliartornerat marlunnik peqquteqarpoq. 1980-miit Savalimmiuniit nuuttartut kisitsisaat appasippallaarsimanngillat. Taassuma ilutigisaanik inuit nunani allani ukiuni arlalinni najugaqareersimallutik Savalimmiunut uteqqittartut amerliartorput.
2016-mi marsimiit 2017-mut Savalimmiunut nuuttartut 473-upput. Nuuttartut 2001-mi qaangerneqarput, tassami 1900-kkut aallartilaarnerani aningaasatigut ajornartorsiortoqarnerata kingorna inuppassuit Savalimmiunut uteqqissimagamik.
Pisoq persuarsiutigineqartoq
Savalimmiuni lagmandi Aksel V. Johannesen (S) pisut oqaluttuarisaanermut ilaasut malunnartinniarlugit Thorshavnimi napparsimaviup ernisarfianut qalipakkamik tunisseqarpoq.
- Naalakkersuisooqatigiit innuttaasut qanoq amerlatiginissaannik immikkut anguniagaqanngillat. Innuttaasut qanoq amerlatiginerat pingaaruteqarpallaanngilaq. Nunamili atugarissaarnerup qulakkeernissaa pingaaruteqarluni. Innuttaasut amerlassusaat piffissap sivisunngitsup matuma siornatigut appariartorpoq. Aningaasaqarneq maanna ingerlallualermat innuttaasut amerliartorput, aningaasaqarnerlu ingerlanerliuleraangat innuttaasut ikiliartoqqilertarput. Taamaammat sinaakkutissat taamatut suliarinissaat pingaaruteqarpoq, taamaasilluta pissutsit allanngorpata tamaani najugaqarsinnaalluta.
Savalimmiormiut nutaarsiassaqartitsiviat portal.fo. malillugu Aksel V. Johannesen napparsimmavimmi oqalugiarnermini taamatut oqarpoq. Savalimmiuni kina innuttaasoq nr. 50.000-nersoq oqaatigissallugu suli siusippallaartoq Hagstova Føroyamit paasititsissutigineqarpoq.