Savalimmiunik isumaqatigiissut aalisartut naammagisimaarpaat

Savalimmiut Kalaallillu Nunaat decembarip 5-aanni aalisarsinnaanermik isumaqatigiissuteqarput. Taamatut paasissutissiivoq Aalisarnermut, Piniarnermut Nunalerinermullu Naalakkersuisoqarfik, taassumalu decembarip 4-aanni 5-aannilu Savalimmiut Københavnimi aalisarsinnaaneq pillugu isumaqatigiinniarfigisimavaa. Namminersorlutik Oqartussat tusagassiorfimmut nalunaarutikkut taamatut paasissutissiipput.

Illua'tungeriit kalaallit savalimmiormiut imartaanni aalisagartassaannik, savalimmiormiullu nunatta imartaani aalisagartassaannik isumaqatigiissuteqarput.

2015-mut isumaqatigiissutip kinguneraa Kalaallit Nunaata ammassassuartassaasa 2.100 tonsiusut attatiinnarneqarnissaat. Taakku saniatigut Kalaallit Nunaata Savalimmiut imartaanni saarullernarniarsinnaanera annertusineqarpoq, 2014-imi 5.000 tonsiusimasoq 2015-imi 5.500 tonsinut qaffanneqarluni.

Kalaallit Nunaata ullut 60-it savalimmiormiut killeqarfianni aalisakkanik naqqasiortunik aalisarsinnaatitaanera peerneqarpoq, periarfissaq taanna ukiuni kingullerni atorneqartarsimanngimmat pisassat appariartornerat pissutigalugu. Taamatuttaaq Savalimmiut raajartassaat 100 tonsiusut peerneqarput pisassat appariartornerat periarfissallu atorneqarsimannginnera pissutigalugu, naalakkersuisoqarfik tusagassiorfinnut nalunaarummini allappoq.

Isumaqatigiissut malillugu Savalimmiormiut Kalaallit Nunaata imartaanni aalisagartassaat ukioq 2014-imut sanilliullugit allannguuteqassanngillat.

Aammattaaq ukioq manna aalisarnermik inuussutissarsiortut isumaqatiginnin­ni­ar­nermi peqataatinneqarput.

Tusagassiorfinnut nalunaarut naapertorlugu Kalaallit umiarsuaatillit aamma inuus­sutissarsiornermik ingerlatsisut isumaqatigiinniarnerni peqataasut, Aalisarnermut Piniarnermut Nunale­ri­nermullu Naalakkersuisoqarfik peqatigalugu nalilerpaat aappaagumut aa­li­sagartassat pillugit isumaqatiginninniarnermi angusarineqartut naamma­gi­nartuusut.