Savalimmiuni ullumi niisarnat 20-30-t pisarineqarput

Sea Shepherd-ip nalunaarutigaa ullumi niisarnat 20-niit 30-nut amerlassusillit, uumasunik illersuiniaqatigiiffiup piniarnermik tamassuminnga taaasineratut, "piuneerussaanermi toqorarneqarsimasut".

Illersuiniaqatigiiffik tusagassiorfinnut nalunaarutikkut taamatut allappoq, tassani aamma allalluni "Niisarnanik aappassaanik amiilaarnartumik toqoraanermi" Savalimmiut eqqaanni imaq appalaartuinnanngorsimasoq.

"Ukioq manna aappassaa Savalimmiut imartaat niisarnanik toqoraanermit aappalaartumik qalipaateqalerput. Piniarneq tusaamanerutaq savalimmiormiusut taaneqartarpoq gindedråp imaluunniit grind", Sea Sherherd allappoq.

Niisarnat ullaakkut sumiiffimmi nalunaaqutaq 08.30 missaani takuneqarsimapput. Kingorna niisarnat qeqertaqatigiit avannaa'tungaanni Hvannasund-imut ungoorneqarput, tassanilu pisarineqarlutik.

Sea Shepherd-ip naatsorsuutigaa niisarnat 20-niit 30-nut amerlassusillit pisarineqartut.

Sea Shepher-ip umiarsuaa, Brigitte Bardot, niisarnanik takunniffimmit 25 nautiske mles-imik kujasinnerusumi alapernaarsuisimavoq, taannalu niisarnat illersoriartornissaannut inortuisimavoq.

Operation Sleppid Grindini Land Teamleader, Rosi Kunneke, Sydafrikameersoq, oqarpoq: " Nungusaalluni aattaqaqisumik toqoraanerit aappassaat ingerlasimavoq naalagaaffimmit politiinik aqunneqaleraluttuinnartumit Savalimmiunit illersorneqarluni. Oqartussaasut tikeraaneersunut inatsisitigut avataaneersunillu killilersuinikkut niisarnarniarnermik siuarsaasut naakkittaatsumik toqoraanermi peqataammata Sea Shepherdip nakkutilliinini nangissavaa. Uumasut toqorarneqarlutik nilliasut tusaanngitsoorusunngilagut", Rosie Kunneke oqarpoq.

Savalimmiuni inatsit, niisarnarniarnermut tunngasoq malillugu inuk kinaluunniit, qeqertanut tikeraartoq niisarnanik delfininillu takunnikkuni tamanna sumiiffimmi oqartussaasunut nalunaarutigissavaa, arferit piniarneqarniassammat. "Inatsisinik pineqartunik malinninngitsut tigusarineqarsinnaapput eqqartuussivikkullu malersorneqarsinnaallutik, savalimmiut aningaasaannik 25.000 koruuninik akiliisitaasinnaallutik ukiullu marluk angullugit parnaarussaasinnaallutik", Sea Shepherd tusagassiorfinnut nalunaarutikkut allappoq.

Sea Shepherde aamma Operation Sleppid Grindini Campaign-imi CEO, kaptajn Alex Corneliussen, inatsit taanna pillugu oqarpoq: "Amiilaarnaqaaq inuit uumassusilinnik illersuisuts inatsisikkut nipangersinniarneqarmata, tamannalu peqatigalugu toqoraanersuarmik ileqqumik tamatuminnga peqataasut illersorlugit. Savalimmiuni pissutsit annilaanganartut tamakkua pissutigalugit Se Shepherd tamaani najuuttariaqarpoq".

Savalimmiuni niisarnanik illersuiniarneq Operation Sleppid Grindini, Sea Shepperd-ip arfinilissaa ingerlappaa.