Savalimmiuni suliffeqarfiup kapisilik milliardinik iluanaarutigaa

Savalimmiuni aalisakkerivik ingerlalluaqisoq Bakkafrost, kapisilinnik suli iluanaaruteqartuarsinnarpoq.

Suliffeqarfik iluanaarutinik angusaqarpoq, akileraarutit aningaasartuutillu allat ilanngunnangit ingerlatsinermut sinneqartoorutit 1,7 milliardi koruuniupput. Kaaviiaartinneqarsimasut katillugit 3,2 milliardi koruuniupput. Suliffeqarfiulli akileraarutit ilaanngaatigereerlugit 1,3 milliardinik koruuninik iluanaaruteqarluni.

Ataasinngormat danskit nutaarsiassaqartitsiviat Berlingske Business.dk taama allaaserinnippoq.

Nunarsuarmi pitsaanerpaat

- Bakkafrosti ingerlatseriaasiat qiviaraanni nunarsuarmi kapisilinnik kinguaassiortitsillaqqinnerpaajupput, suliffeqarfiit quliti niueqatigiittarfimmi allattorneqarsimasut Norgemeersut Chilemeersullu Marine Harvestip ataaniittut, Lerøy, Salmari Aqua Chilelu, aktianik misissuisartoq Nordea Marketsimeersoq, Kolbjørn Giskeødegård, Berlingske Business taama oqarpoq.

Bakkafrostip unammillertiminut sanillullugu kapisilimmut kilomut iluanaarutigisartagaat annertunerusoq tikkuarpaa.

- Taamaasilluni suliffeqarfiup kapisililerilluni ingerlatsinermut aningaasartuutit annikinnerpaanerat naqissuserpaa. Bakkafrostip kapisilinnik ingerlatsivitsik nutarternerata kingorna ingerlatsinermut aningaasartuutaat annikilleqqissasut ilimagaara,
Kolbjørn Giskeødegårdi taama oqarpoq.