qinersineq
Savalimmiuni qinersipput
Qineqqusaarutigalugu assit amerlasuujusut tusagassiortup maluginiarpaa
Savalimmiuni qinersisoqaleruttorpoq. Savalimmiuni qinersiviit Kalaallit Nunaata nalunaaqutaa naapertorlugu nalunaaqutaq arfineq marlunut ammarneqarput.
Savalimmiuni inuit 36.458-t qinersisinnaatitaapput, kingillermi qinersinermit qinersisinnaasut 851-nik amerleriarsimapput.
Naligiiffiulerunartoq
Savalimmiuni politikkerit 169-it qineqqusaarput, aamma Savalimmiuni innuttaasorpassuit qinersisarput. 2011-mimi qinersisoqarpat qinersisinnaasut 86 procentii qinersipput.
Unnuk qinersivik pissanganartuussagunarpoq. Naalakkersuisuutitaqartummi nuannarineqarnerat annertusiartorpoq, naak juulip 29-ani qinersinissamik suaaruteqartoqarmat nuannarineqarsimarpianngikkaluartut.
Qinersinissamimmi suaaruteqartoqarmat illuatungiliuttut siuaqqanerujussuugaluarput. Maannakkulli naligiittorujussuupput.
Partiit arfineq marluk qineqqusaartitsipput, unnugulu nalunaaqutaq 20 imaluunniit 21 paasinarsissajunnarsivoq kikkut qinersinermi ajugaasimanersut.