niisarnarniarneq
Savalimmiuni niisarnat 150-it missaanniittut pisarineqarput
Savalimmiuni ukioq manna niisarnarniarnerit annerit siullersaat ullaaq Vágarimi pivoq
Sea Shepherd Savalimmiuni niisarniarnermik ullumi kamaatiginnippoq.
Savalimmiuni qeqertami Vágarimi nunaqarfiup Miðvágurip eqqaani niisarnat 100-t aamma 150-it akornanniittut ullaaq pisarineqarput. Ukioq manna niisarnanik pisaqarnerit siullersaat.
Sea Shepherd Savalimmiormiut niisarnarniartarnerat Sea Shepherdimit peqqarniitsumik toqoraanertut taaneqartartoq unitsinniarlugu ukioq manna arfinilissaa Savalimmiuniippoq.
Sea Shepherdip niisarnarniarnermi siuttuusoq niisarnat 150-it missaanniinnerannik issuarpaa, pisortatigoortumik kisitsisit suli amigaataammata. Sea Shepherdip niisarnanik toqoraaneq ukiuni kingullerni marlunni aassunnernerpaatut nalilerpaa.
Niisarnanik toqoraaneq Sea Shepherdip inuttaasa Savalimmiuliarnissaat sapaatip-akunnerinik marlunnik sioqqullugu pivoq, suliniaqatigiiffiup ima taasaa aallarnerniarlugu: 2015 Faroe Islands Pilot Whale Defense Campaign,Operation Sleppid Grindini.
Savalimmiuni aalisarnermut nakkutilliissutip Brimilip niisarnarpassuit qeqertap Vágarip kujataaniittut naammattoormagit niisarnarniarneq najukkami nalunaaqutaq malillugu ullaakkut sisamanut aallartippoq.
Niisarnarpassuit umiatsianit 25-t missaanniittunit akunnerit tulliuttut sisamat tallimalluunniit ingerlaneranni Miðvágurip eqqaani sissamut ungoorneqarput, tassanilu toqorarneqarlutik
Sea Shepherd Globalip pisortaa Alex Cornelissen tusagassiorfinnnut nalunaarummi oqarpoq, Savalimmiuni sissaq niisarnat hundredelikkuutaat toqorarneqartut aavannik aappaluttuinnanngoqqittoq. Sea Shepherdip sissat nakuuserfiusut taakkua isiginianngippagit toqoraaneq tamanna sakkukilliiminani ingerlaqqissaaq. Imaani toqoraarujussuarnerup tamatuma nunarsuarmiunit arajutsineqarsinnaannginnissaa qulakkeerusupparput, tusagassiorfinnut nalunaarut naapertorlugu oqarpoq.
Nunamut Suleqatigiit aqutsisuat Rosie Kunneke Sea Shepherdip tusagassiorfinnut nalunaarutaani oqarpoq, uumasut taakkua akunnerni ilungersunartuni sisamat sinnilinni annanniaraluarlutik tamaviaarsimasut. Naalliutsinneqarput, anniartinneqarlutik, ilaquttamillu saavanni peqqarniitsumik toqorarneqarlutik. Tamanna ileqquunngilaq. Aammik kuisineruvoq, Rosie Kunneke oqarpoq.
Sea Shepherd tusagassiorfinnut nalunaarutimini nangilluni allappoq, Savalimmiuni innuttaasut niisarnanik imaannarmi ingerlaartunik sissamut ikkattumut toqorarneqarfigisinnaasaannik ukiuni hundredelikkuutaani ungoorisarsimasut. Toqoraanermi Savalimmiormiunit grindadrápimik imaluunniit grindimik taaneqartartumi arferit aarluarsuillu ilaqutariiaat tamakkerlugit ataatsikkut nungutinneqartarput.
Suliniut Operation Sleppid Grindini Sea Shepherdip Savalimmiuni suliniutaasa arfinilissaraat. Sea Shepherdip umiarsuai Bob Barker, Sam Simon aamma Brigitte Bardot tamatumani siuttuupput, nunamiittunillu ikiorteqarlutik. Paasisitsiniaaneq tamanna Sea Shepherdip maannamut najuunnerata sakkortunerpaartarissagaa, tusagassiorfinnut nalunaarutaanni allassimavoq.
Savalimmiormiut Sea Shepherd unitsinniarsimagaluarpaat, iluatsitsinatilli.
Assit matuma ataaniittut takukkit,