Wednesday, January 10, 2018 - 07:04

Savalimmiuni mittarfik rekortiliisoq

Assi.: Vagar Lufthavn
Savalimmiuni Vagarimi mittarfik 2017-imi angalasui 17 procentimik amerleriarput, ilaasut 341.000-t tikissimammata, tamanna ukiumut siulianut sanilliullugu 50.000-t missaannik siuariarneruvoq.

SAS Savalimmiunut aqqummik pilersitsinikuuvoq, taamaalillunilu Savalimmiormiut Atlantic Airwaysiannut Københavnimut aqqummut unammillertaallutik.

- Atlantic Airwaysip angalaffissat neqeroorutaasa aatsaat taama amerlatiginerisa aamma SAS-ip Københavnip Savalimmiullu akornanni angallassisalerata, kiisalu attartukkanik timmisartuussisarnerit amerlinerisa kingorna Savalimmiunut tassanngaanniillu angalanissamut periarfissat amerlanerutippai, Jákup Sverri Kass, Vagarimi mittarfimmi pisortaq oqarpoq.

Takornarissat amerlanerusut
Takornarissat amerlanerusut Savalimmiut tikittaleraluttuinnarpaat. Mittarfeqarfiup ukiuni kingullerni mittarfinni misissuinerata takutippaa, qaammatit tamaasa savalimmiormiut nunanit allaneersunit angalasanut Vagarikkoortartut amerlanerusartut. Juulimili misissuinerup takutippaa, nunanit allaneersut juulimi savalimmiormiunit amerlanerusut angalasimasut, mittarfeqarfik nittartakkamini ilisimatitsivoq.

Akunnittarfinnik amigaateqarnerup kingunerani mittarfiup timmisartumik aqqut pilersaarutaasoq siorna annaavaa.

Skotlandimiup Aberdeenip aamma Savalimmiut akornanni maajip 26-annit 2017-imit timmisartortalertussaagaluarput. Vagarimi mittarfiup timmisartortitseqatigiiffiit pingajuannik pissarsitissagaluarpaa, Check-In.dk ilisimatitsivoq.

Akunnittarfiit amerlanerusut
- Naak Savalimmiuni unnuiffissatut periarfissat amerlaneruleraluartut, takornarissat akunnittarfinni inissaqartarsimannginnerat oqaatigineqartarpoq. Taamaammat akunnittarfiit anginerit ukiuni aggersuni inissat marloriaatinngortinniarlugit nalunaarutigimmatigit nuannaarutigaarput, Jákup Sverri Kass oqarpoq.

Læs også

Seneste nyheder / Nutaarsiassat kingulliit