Savalimmiut
Savalimmiuni ministeri: Niisarnarniarnermik akerliuniat allatut unitsinniartariaqarpavut
Akerliuniartartut soorlu Seaf Shepherd Savalimmiunut isersinnaanerat inerteqqutigilerniarlugu qallunaat naalakkersuisuisa nunat allamiunut inatsisit allanngortinnianngilaat
Akerliuniartartut, agginnginnerminni inatsisinik unioqqutitsillutik iliuuseqarniarlutik nalunaaruteqareertartut Savalimmiunut iseqqusaajunnaartinnissaannik aalajangiivigisassatut siunnersuut Savalimmiuni Inatsisartuni amerlanerussuteqarluartut akuersissutiginikuugaluarpaat.
Nunat allamiunut oqartussaaffik qallunaat oqartussaaffigaat, taamaattumik inatsisissatut siunnersuut Savalimmiuni Inatsisartunut saqqumiunneqarsinnaasimanngilaq.
Sea Shepherdip iseqqusaajunnaarnissaa Danmarkip itigartippaa
Savalimmiuni naalakkersuisut siulittaasuata Jóhan Dahl-ip, ilaatigut aamma nunat allamiunut tunngasunut ministerip, tallimanngormat qallunaat inatsisinik atortitsinermut ministeriat Mette Frederiksen ataatsimeeqatigaa, tamatumani savalimmiormiut kissaataat saqqummiullugu. Qallunaalli naalakkersuisuisa Sea Shepherdip Savalimmiunut iseqqusaajunnaarnissaanut nangaapput.
– Ataatsimiinnerup inerneraa nunat allamiunut inatsit allanngortinneqassanngitsoq, taava avatangiisinik illersuiniaqatigiit niisarnarniarnermik unitsitsiniartut unitsinnissaannut allanik periarfissarsiortariaqarpugut, Jóhan Dahl oqaproq.
Katalogi allanik periarfissartalik
Qallunaat naalakkersuisuisa inatsisinik pissuteqarlutik nunat allamiunut inatsit allanngortinnianngilaa, savalimmiuni naalakkersuisut siulittaasuat oqarpoq. Taarsiullugu katalog-iliussaagut takussutissiisumik akerliuniat pakkersimaarnissaannut periarfissanik allanik soqarnersoq.
– Nunarsuaq tamaat isigalugu avatangiisinik illersuiniaqatigiinnit tatineqartarneq nutaajunngilaq. Nunat allat tatisiniarnerit taamaattut pinngitsoorittarmatigit aamma uagut maani taamaasiorsinnaavugut, Jóhan Dahl oqarpoq.
Niisarnarniarneq immikkut
ilinniarsimasunik paarineqarluni
Sea Shepherd Savalimmiuni akerliuniarnerminik siorna aatsaat taama annertutigisumik ingerlatsivoq. Qaammatit sisamaata affaani akerliuniat 300 aamma 400 akornanniittut sinnersaraallutik Savalimmiuni nunami imaanilu akornusersuiniarsimapput. Ilaatigut taaneqarlutik avatangiisinik innarliiniaqatigiittut.
Taamanikkut niisarnarniarneq unitsinneqarmat Sea Shepherd peqataavoq.
Savalimmiuni oqartussaasut Sea Shepherd-ilu tamarnik immikkut nassuiaateqarput sooq niisarnarniarneq unitsinneqarsimanersoq. Sea Shepherd imminut nersualaarluni tamatumunnga pisuutippoq, savalimmiormiullu oqartussaasui oqarput silarlunnera pissutaasoq.
Septembarimi niisarnarniarnermi niisarnat 33-t toqunneqarput, tamannalu pivoq sakkut immikkut ilinniarsimasut Danmarkimeersut suleqatigalugit.
Tamatumunnga atatillugu akerliuniat 14-it tigusarineqarput savalimmiuni niisarnarniarnermut inatsimmik unioqqutitsisutut. Taakkua ilaat arfinillit ukiumi ataatsimi Savalimmiunut iseqqusaajunnnaarsitaapput.