Savalimmiormiut alfabeti assortuussutigaat

Savalimmiuni alfabetip taaguutai allaanerulluinnarput. Oqaatsit pissutigiinnarnagit. Tassami naqinnerit c, q, w, x aamma z atunngilaat.
Assersuutigalugu amerikami kujallermi nuna Chile k-lerlugu allarnneqassaaq, nettimi ujaraanni. Tamatuma saniatigut ajornartorsiuteqarpoq oqaatsit kilowatt aamma celcius allanniaraanni.
Tamanna Savalimmiuni inatsisartunut ilaasortap partiimit Socialdemokratineersup Henrik Old-ip qatsulluinnarpaa. Inatsisartuni, Langtingimi, suliarisassatut siunnersuutigaa naqinnerit taakkua tallimat savalimmiormiut alfabetiannut ilanngunneqarnissaat. Republikanerit siulittaasuat Høgni Hoydal isumaqarpoq siunnersuut tamanna politikerinut siunnersuutigineqassanngitsoq.
– Siunnersuut inatsisartuni inatsisikkut aalajangerneqarpat taava savalimmiormiut oqaasii pituttorneqassapput peersikkuminaatsumik. Savalimmiormiut naqinnerit piumasatik atorsinnaavaat, oqaatsinut politeeqanngilaq nakkutilliisunik, Høgni Hoydal erseqqissaavoq.
Taassuma savalimmiormiut alfabetiat maanna atuuttoq ajorinngilluinnarpaa, allanngortinneqassappallu tamatuminnga kissaateqartuussaaq savalimmiuni oqaatsinut ataatsimiititaliaq.
Akerlianik Henrik Old isumaqarpoq naqinnerit tallimat taakkua amigaatigineqarmata ulluinnarni pissutsinik isumaqanngitsunik pilersitsisartoq. Naqinnerit tallimat taakkua savalimmiut alfabetiannut 29-nut ilanngunneqassappata tamanna paatsiveerutsitsissaaq, adjunkt isumaqarpoq.
– Oqaatsinut ataatsimiititaliap nalilersimavaa, naqinnerit tallimat alfabetimut ilanngunneqassappata tamanna inunnut suli ajornartorsiortitsinerulissasoq. Pingaartumik paatsiveerunneqassaaq assersuutigalugu k imaluunniit c qaqugukkut atorneqartassanersut, taanna oqarpoq.