akerleriinneq
Savalimmiormiut aalisartut Islandip imartaanit peersinneqartut
Savalimmiormiut umiarsuaat Islandip imartaani aalisaqqusaanngillat. Savalimmiuni aalisarnermut naalakkersuisup Island isumaqatigiissummik atuuttumik atuutsitsiunnaartutut pisuutippaa.
Islandip Savalimmiullu akornanni suleqatigiinnermi ingerlanerluttoqarpoq.
Islandimiup aalisarnermut naalakkersuisortaavatanu Kristján Þór Júlíussonip ingerlaannaq atuutilersumik Savalimmiormiut aalisariutaasa Islandip imartaani aalisarsinnaanerannut akuersissutit tamaasa utertippai.
Savalimmiut aamma Islandip 2018-imut aalisarnermut isumaqatigiissut isumaqatigiissutigisinnaanngimmassuk tamanna pivoq. Isumaqatigiissummut nutaamut isumaqatiginninniarneq Thorshavnimi decembarip 13-anni pivoq. Illuatungeriit ammassassuarnut, saarullinnut aamma ammassannut pisassiissutit isumaqatigiinngissutigaat.
Islandip ammassanniarnermut isumaqatigiissut atorunnaarsissimagaa Savalimmiunit pasilliutigineqarnerata kingorna, nutaamik isumaqatigiissusiornissaq ajornaannerulinngilaq. Aalisakkanut allanut sanilliullugu taanna isumaqatigiissut apriilip 30-at 2018 tungaanut atuuttussaavoq.
Islandip isumaqatigiissummik atuutsitsiunnaarnera, aalisarnermut naalakkersuisup Høgni Hoydalip tupigusuutigaa.
- Nunat akornanni isumaqatiginninniarnerit nunat tamarmik kissaataat aamma illuatungeriinnut iluaqutaasunik iluarsiniarsarinikkut ingerlapput. Isumaqatiginninniarnerit pitsaasumik - pisarneq malillugu aallartippagut, Høgni Hoydal oqarpoq.
Islandip nerineqarsinnaasup annertussusaa killileraa
Islandip ammassannik aalisarnermut sukangasumik piumaqaateqartarnera, Savalimmiut sivisuumik naammagisimaanngilaat. Pisat pingajorarterutaannaat inuit nerisassaannut atorneqarsinnaanerat Islandip piumasaraa. Sinneri nerukkaatinut akikinnerusumik pissarsiaqataasunut atorneqartarput.
- Savalimmiut ukiuni arlalinni allannguisoqarnissaanik kissaateqarput, taamaattumillu aalisarnermut isumaqatigiissummik pisuussutinut pitsaanerpaamik akeqartitsinissamik pilersitsisoqarsinnaannginnera paasiuminaappoq. Nalilerujussuit annaaneqarput, Høgni Hoydal oqarpoq.
Isumaqatigiissummik killilersuinerit Hoyvikimik isumaqatigiissummik unioqqutitsinerusut, Savalimmiuni naalakkersuisut isumaqarput, taanna Islandip Savalimmiullu akornanni ammasumik niueqatigiinnissamik isumaqatigiissutaavoq.
Ammassaat pillugit akerleriinneq aaqqinneqarsinnaappat, sinaakkutitut isumaqatigiissummik ukiorpassuarni atuussinnaasumik isumaqatigiittoqarsinnaasoq, Høgni Hoydal savalimmiormiut tv-annut oqarpoq.
Islandimiut neqeroorutaat itigartinneqartoq
Naak ammassanniarneq aalisarnermut isumaqatigiissummi allatut killeqaraluartoq, ammassaat pillugit noqqoruunneq aalisakkat sinnerinut isumaqatigiinninniarnerit ilaannut ilannguppoq.
Savalimmiut Islandip imartaanni saarullinniarnerunissamik aamma kissaateqarput. Taamaammat Savalimmiut aalisakkanik ikerinnaasiortunik pisassiissutinik taarsiullugu Island neqeroorfigaat.
Høgni Hoydal naapertorlugu Islandip neqeroorut tamanna akueriumanngilaa, Savalimmiullu Islandip imartaani saarullinniarnerulissappallu ammassannik pisassiissutit 20 procentimik ikinnerulernissaat piumasaralugu.
Islandimiut siunnersuutaat Savalimmiut akuerinngilaat, 2017-imi decmbarip 31-ata kingorna Islandip Savalimmiullu akornanni aalisarnermut isumaqatigiissuteqarunnaarpoq.
Islandimiup umiarsuaasa Savalimmiut imartaanni saarullernartassat 90 procentii tikillugu aalisarsimagaluarpaat. 2017-imi Islandimiut umiarsuaasa saarullernat 196.300 tonsit aamma ammassassuit 25.500 tonsit aalisarpaat.
Ammassassuarnut isumaqatigiissuteqartoqanngitsoq
Island aamma Savalimmiut imartaminni qanoq aalisartoqartigisinnaaneranik kisiat isumaqatigiinngissuteqanngillat. Nunat aamma aalisakkat ikerinnaasiortunut pisassiissutit qanoq amerlatigissaneri isumaqatigiinngissutigaat.
Island ukiuni tallimani isumaqatigiissummut nunatut sinerialittut peqataanngilaq, taanna EU-p, Norgep aamma Savalimmiut 2014-imi atsioqatigiissutigaat. Taamani Savalimmiut annertuallaamik pissarsiaqartartut isumaqarput.
Nunalli sineriallit ammassassuartassiissutit ikilisinniarlugit isumaqatigiissutigaat, taamaalilluni aappaagu 435.000 tonsit sinnerlugit aalisarneqassanngillat. Tamanna 33 procentimik appaaneruvoq. ICES-ip 40 procent siunnersuutigigaluarpaa.
Tamanna suli inissivinngilaq, nunat qanoq annertutigisumik immikkut pissarsinissaat isumaqatigiissutigineqanngimmat. Savalimmiut 19,4 procentimut inissippaat. Tamanna 2017-imut sanilliullugu 40.000 tonsimik annikinneruvoq.
Naalakkersuisup Høgni Hoydalip nunanut allanut ataatsimiititaliaq suliaq pillugu ataatsimeeqatigisimavaa.
Isumaqatiginninniarnerit qaqugu aallarteqqinnissaat suli nalunaarutigineqanngilaq.