Kuannersuit
Savaatillit uranitalinnik eqqaavissaq ernummatigaat
Savaatillit Peqatigiit Suleqatigiissut piumasaraat Kuannersuarni aatsitassanik piiaasoqalernerani uranitalinnik akullit tasermut eqqarneqannginnissaat. Savaatillit aamma ilisimasalinnik arlaannaannulluunniit attuumassuteqanngitsunit tikinneqarusupput
Greenland Minerals and Energy, Narsap eqqaani uranimik aatsitassanillu qaqutigoortunik piiaaniarluni pilersaaruteqartup, ukiut marluk sinnilaarlugit qaangiuppata aatsitassarsiorfiliortoqalersinnaasoq naatsorsuutigaa.
Savaatillit Peqatigiit Suleqatigiissut maanna Naalakkersuisuutitaqalersunut ammasumik allagaqarput savaatillit Narsap eqqaani tasermut uranitalinnik eqqaasoqannginnissaa piumasarigaat.
- Savaatillit Peqatigiit Suleqatigiissut siulersuisuiniit naalakkersuisuutitaqalersut pilluaqqujumavagut. Neriulluta tusaaneqartarluta qanimut suleqatigisinnaajumaarlugit.
Taama Savaatillit Peqatigiit Suleqatigiissut tusagassiuutini nalunaarumminni allapput.
Savaateqarnerup eqqorneqarsinnaanera ernumagaat
Savaatillit Peqatigiit Suleqatigiissut uranitalinnik eqqagassat Narsap eqqaani tasermut ignneqartarnissaannut pilersaarutit juunimi ataatsimeersuarnerminni ilaatigut eqqartorsimavaat.
Ataatsimeersuarnermi tassani savaatillit amerlanerussuteqartut tasermut eqqagassanik uranitalinnik eqqaasoqannginnissaa innersuussutiginiarlugu aalajangiussimavaat.
Tamatuma saniatigut savaatillit aamma ernummatigaat inuussutissarsiutertik aatsitassarsiortoqalerneratigut eqqorneqarsinnaanera.
- Savaateqarnermik nunalerinermillu inuussutissarsiuteqarneq uranimik akulinnik aatsitassarsiulernissamit innarlerneqaratarsinnaaneranut sunnguamilluunniit illersornissaanut piumasaqaatitaqanngitsumik sillimmateqanngitsumik aatsitassarsiornissaq aallartinniarneqassappat akuerisinnaanngilara, Ellen K. Frederisekn Qassiarsummeersoq Savaatillit Peqatigiit Suleqatigiissut juunimi ataatsimeersuarmata ilaatigut taama allappoq.
Ilisimasalinnit tikinneqarusupput
Savaatillit Peqatigiit Suleqatigiissut aamma arlaannaannulluunniit attuumassuteqanngitsunik ilisimasalinnik tikinneqarusupput.
- Ataatsimeersuartut aamma kissaatigaat arlaanaannulluunniit attuumassuteqanngitsunik ilisimasalinnit tikinneqarnissaq.
Soorlu avannaannut Nuummullu taamaaliortoqarsimasoq. Nalominerpaalli kujataa- miut tikinneqarsimanatik, Savaatillit Peqatigiit Suleqatigiissut Naalakkersuisunut allakkaminni ammasuni taama allapput.