aatsitassat
Savaatillit Kuannersuarni suliniut akerleraat
Kujataani savaatillit 30-t ammasumik aatsitassarsiorneq aallartippat qinngornernik ulorianartunik kemikalianillu arrortikkuminaatsunik akulinnik avatangiisiminnut siaruaattunik mingutsitsisoqarnissaa ernumassutigalugu nalunaaruteqarput
Narsap Qassiarsuullu eqqaani savaatillit 30-t Namminersorlutik Oqartussanut allagaqarput Kuannersuarni ammasumik aatsitassarsiorfiliortoqassappat kingunerisinnaasanut ernumanerminnik anngussillutik.
- Ullumikkut kissaatiginngilluinnarparput Kuanersuarni ammasumik aatsitassarsiorniarnerup piviusunngortinneqarnissaa, savaatillit Narsap Qassiarsuullu eqqaaneersut taama allapput.
Savaatillimmi tulluarsorinngilaat uranimik akulinnik aatsitassarsiorfiup inuussutissalerinermi suliffeqarfiit nunap pissarititaanik pilersorneqartut sanileralugit ingerlanneqarniarnera.
- Aamma uranimik akulinnik aatsitassarsiorfiliorniarneq Kujataata isigineqarneranut pitsaanngitsumik kinguneqassasoq, tatiginnikkunnaassapput ilumut tunisassiat mingutsinneqannginnersut, takornariallu nuna ornitassatut kajungeriunnaassavaat, savaatillit allapput.
Atuaruk: Savaatillit uranitalinnik eqqaavissaq ernummatigaat
Taarsiiffigineqarnissaq qulakkeeqquvaat
Savaatillit Peqatigiit Suleqatigiissut aasaanerani ataatsimeersuarnerminni juni 2014-imi Naalakkersuisunut allakkatigut saaffiginissuteqarput, piumasaqaateqarlutik qinngornernik ulorianartunik taillings-inillu annertuumik mingutsitsisussanik Narsap eqqaani Tasermi eqqaasoqannginnissaa piumasaralugu.
— Taassuma saniatigut kissaatigineqarpoq nunalerinermik inuussutissarsiornerup innarlerneqannginnissaa, inuusutissarsiulli innarlerneqassappat annaasaqaatigineqartut taarsiiffigineqarnissaannik qulakkeerinnittoqassasoq, savaatillit isumakuluttut taama allapput, taakkua Namminersorlutik Oqartussanut ammasumik allagaqarnermikkut eqqarsaatitik Nunatsinni innuttaasunut tamanut tusartikkusuppaat.
Atuaruk: Urani pillugu paasisitsiniaaneq unitsiinnarneqarpoq
Nalilersuisoqarnissaa piumasaraat
Savaatillit paasissutissiinerat najoqqutaralugu tusarniaanermi Kommune Kujallermiit akissutigineqarsimavoq Kuannersuarni aatsitassarsiornerup inuussutissarsiutinut pioreersunut aamma Kujataata kinaassusaanut sunniutigisinnaasai kiisalu savanik neriniartitsiviit qanoq sunnerneqassanersut nalilersorneqassasut.
- Kissaatiginarpoq Kommune Kujallermi suliniutit angisuut pillugit pilersaarutit inernerinik tutsuiginartunik saqqummiusisoqarumaartoq, nunalerinermik sammisaqartugut inuunitsinnut aammalu nunatsinnut pitsaanngitsumik sunniuteqartussaammat. Taamaammat kissaatiginarpoq Namminersorlutik Oqartussat isumaliutigilluaqqaarlugu eqqortumik aalajangerumaartut, savaatillit Narsap Qassiarsuullu eqqaanersut taama allapput.
Atuaruk: Savaatillit: Uranip inuussutissarsiupput ulorianartorsiortippaa?
Attuummassuteqanngitsumik misissuisoqaqquvaat
Kujataani savaatillit arlaannaannulluunniit attuumassuteqanngitsunik ilisimasalinnik suli tikinneqarusupput, soorlu avannaannut Nuummullu siorna paasitsiniaajartortilluni taamaaliortoqarsimasoq, kisianili nalominerpaat kujataamiut suli tikinneqarsimanatik.
- Innuttaasutut kiffaanngissuseqarluta nunami maani inuunissatsinnut kissaatigaarput Namminersorlutik Oqartussat immikkut tamanut attumassuteqanngitsumik avataaniit ilisimatuunik misissuisitsinissamik pilersitsissasut Kuannersuarni aatsitassarsiortoqalissappat inuussutissalerinermut takornarialerinermullu qanoq kinguneqassanersut paasiniarlugit.
Savaatillit taama allapput, nangillutillu:
- Neriuutigaarput Kuannersuarni aatsitassarsiortoqalernissaanut isummagut Namminersorlutik Oqartussanit pimoorunneqarlutik tusaaniarneqassasut. Kuannersuarni suliniutit pillugit Naalakkersuisut tusarfiginissaat qilanaaralugu.
Sermitsiaq normu 13-imi savaatillit Kuannersuarni uranitalinnik aatsitassarsiorfiliornissaq pillugu Nunatsinni pisortanut innuttaasunullu allagaat ilanngunneqarput. Aviisi uani pisiariuk.
Assip ataani grafikki takuuk