Traditioner
Savaatillit katerisimaarneranni soorunami savaarartortoqartarpoq
Pisarnertut Kujataani savaatillit Qaqortumi katerisimaarput
Tallimanngormat Puilasumi ukiumoortumik ataatsimiittoqarpoq assigiinngitsorpassuarnik oqaluuserisaqarluni. Immikkoortut pingaaruteqarnerpaat ilagaat savaatillit peqatigiiffianni "Savaatillit Peqatigiit Suleqatigiissut" siulersuisuinik qinersineq. Tamatumani siulersuisunut ilaasortat tamangajammik taarserneqarput, tassa siulersuisunut ilaasortaasimasut tamangajammik qinigassanngorteqqinngimmata.
Taamaattumik makkua siulersuisunut qinerneqarput:
Carl Frederiksen, Frederik Frederiksen, Suulut Hansen, Mâse Kanuthsen, Niels Lund (Aqqa).
Sapaatip akunnerani aggersumi siulersuisut nutaat inissititissapput. Siulittaasunngorsinnaavoq Carl Frederiksen, Qassiarsummeersoq, qinersinermi taanna taaguunneqarnerpaasimammat (47-nik taaneqarluni).
Savaatillit ataatsimiinneranni aamma peqataapput Nunalerinermut siunnersuisoqatigiit Inatsisartunut ilaasortat: Finn Karlsen, Siverth Heilmann, Ane Hansen, Nikolaj Jerimiassen. Arfininngormat nal.11.00 pisarnertut assigiinngitsunik sammisaqartitsineq aallartinneqarpoq, unnukkut Qaqortup Timersortarfiani nereqatigiinnissaq/qitinnissaq sioqqullugu ingerlanneqartunik.
Arpaliunneq
Nalunaaqutaq 11.00 nallerluarlugu sisorartartut klubbiat QSP aamma K33 kiisalu savaatillit peqatigiiffiat suleqatigiillutik arpaliunnermik unammisitsipput tasersuaq kaajallallugu, ikittuinnaallu peqataaniarlutik nalunaarsimapput.
Illoqarfimmiut marluk savaatilimmit Suulut Hansenimit siulliullutik apuupput. Mads Møller ajugaavoq, Lars Rasmussen normu 2-julluni. Inatsisartunut Nunalerinermullu siunnersuisoqatigiinnut ilaasortaq Finn Karlsen, ukiut 40-t matuma siornatigut tasersuaq kajaallallugu arpannermi ajugaasimasoq normu 5-inngorpoq. Arnani ajugaavoq Asta Vahl Rasmussen. Ualikkut timersortarfimmi assigiinngitsunik aqqissuisoqarpoq.
Siullermik ukioqatigiit assigiinngitsut noqqoruutsinnieqarput. Savaatillit ulluinnarni nukiminnik atuisartut, ukioqatigiinni tamani ajugaapput. Nalunaaqutaq 15.00 savaatillit illoqarfimmilu oldboys-it klubbiat arsaannermik unammipput. Savaatillit 8 - 5-imik ajugaapput.
Aappariit Agnethe & Sofus Mathiassen ulluni savaatillit katerisimaarfiini Qaqortoq MiniTivoli aaqqissuussimavaat, meeqqanit nuannarineqaqisumik.
Unnukkut nalliuttorsioqatigiittoqarpoq savaarartortoqarluni naggataatigullu nipilersortoqarluni.
Timersortarfik kujataamiorpassuarnik ulikkaavippoq.
Arnat marluk Savaatillit peqatigiiffianni ataqqinaammik ilaasortanngortinneqarput. Ataqqinaammik ilaasortanngortittaapput Bibi Bjerge aamma Jørgine Frederiksen.
Aappaagu savaatillit katerisimaarnissaat Narsami ingerlanneqassaaq.