nunalerineq

Savaatillit 37-it 16 millioner koruuninik tapiiffigineqarsimapput

Savaatillit savaaqqanik ukiumut 20.000-t angullugit amerlassusilinnik tunisassiortarput. Tapiiffigineqarnissaalli pisariaqarpoq: – Tapiissuteqanngitsuuppat aningaasarsiutigalugu savaateqarneq tamarmi qularnanngitsumik unissagaluarpoq, nalunaarusiaq nutaaq taamatut inerniliivoq

Savaateqarfik Igdlorsuit

Nunatsinni savaatillit neqinik mamartorujussuarnik pilersitsisarput. Tamannalu pisarpoq pissutsit piumasaqaateqarfiusorujussuit atorlugit - qularnanngitsumik nunarsuarmi piumasaqaateqarfiunerpaat.

Inuussutissarsiulli iliungersunartuuvoq, savaateqarfiillu ilarpassui aningaasaqarneq ataqatigiissinniarlugu pisortanit aningaasarpassuarnik tapiiffigineqartarput.

Tamanna nassuiaammi suli tamanut saqqummiunneqanngitsumi, Inatsisartut Nunalerinermut Ataatsimiititaliaannut agguaanneqaqqammersumi, atuarneqarsinnaavoq.

Kiilumut 53 koruunit

Nassuiaat naapertorlugu Kujataani savaateqarfiit 37-it katillugit 16 millioner koruuninik toqqaannartumik tapiiffigineqarsimapput. Tassa imaappoq, savaaqqamut ataatsimut Narsami Neqi A/S-imut tunineqartumut 774 koruuninik.. Imaluunniit kiilumut 53 koruuninik.

Oqartoqarsinnaavoq kalaallit atuisartut savaaqqap neqaa ataasiaannarnagu akilertaraat: Siullermik pisortat tapiissutaasigut, innuttaasut akileraarutaannit aningaasalerneqartumik, tamatumalu kingorna pisiniarfimmi akisungaatsiartumik pisiarinerani.

Nassuiaat naapertorlugu 2014-imi savaatilinnut tamanut 425.565 koruunit toqqaannartumik tapiissutigineqarsimapput. Nassuiaalli naapertorlugu tamatumunnga ilanngunneqassapput ´toqqaannanngitsumik tapiissutit´, inuussutissarsiutip iluaqutigilluarsimasai, tamakkulu 2014-imi - ukioq taanna naatsorsuiffiusumi - 10 millioner koruuniusimapput. Tamakkununnga ilaatigut ilaapput siunnersortinut aningaasartuutit Neqimullu tapiissutit.

Oqaluttuaq tamaat, nalunaarusiamilu nutaami inassuteqaatit sunnersut AG-mi atuaruk. Aviisi pisiniarfinni ataanilu e-aviisitut pisiarisinnaavat:

Powered by Labrador CMS