nunalerineq
Savaateqarfiit akiitsut silallu pissusaata allanngoriartornera pissutaallutik matoorartut
Savaateqarfiit tallimat akiitsut silallu pissusaata allanngoriartornera pissutigalugit ukiut pingasut ingerlanerinnaanni matupput
Savaateqarnermik inuussutissarsiut mianernartuusinnaavoq silap qanoq innera apeqqutaalluinnartarmat. Inatsisilli savaateqarfiit allat matugaangata savaatilinnik inuusuttunik nutaanik aallartittoqartannginneranut aamma pissutaasinnaapput.
Frederik Frederiksen, Nukassi, Qassiarsuup eqqaani savaateqarfeqartoq Savaatillit Peqatigiit Suleqatigiissut siorna ataatsimeersuarneranni siulittaasunngorpoq, savaateqarnermillu inuussutissarsiutip ukiuni makkunani silap pissusaata allanngoriartornera, maannamut ajunngitsunik nassataqarsimanngitsoq, pissutigalugu mianernartuuneranik ilisimaarinnilluarluni.
Atuaruk: Savaatillit aningaasanik ikiorserneqassapput
Savat perlerortut
– Silap pissusaata allanngoriartornerata savaateqarnermik inuussutissarsiummut iluaqutaanissaa isumalluar gineqarsimagaluarpoq, maannamulli misigisimasatsinnit akerlerluinnaata pisimanera takutinneqarluni. Silap pissusaata allanngoriartornera maannamut iluaqutigisimanngilarput, akerlerluinnaanik pisoqarsimammat. Siorna annertuunik pingasunik ajornartorsiuteqarpugut.
– Siullermik upernarumaataarneranik, taavalu kingusissorujussuarmik aasarumaataarsimaneranik, pingajussaattullu teriannissat akornanni perlerortoqarneranik, suli ullumikkumut ajornartorsiutigisatsinnik. Savarpassuarnik annaasaqarsimavugut, qularnanngitsumillu savat arlalissuit perlerornermik nappaateqalersimapput toqqutigisimallugulu, Frederik Frederiksen oqarpoq.
Atuaruk: IA: Savaatillinnut ikiorsiiniarneq naalakkersuisooqatigiinnit kinguarsarneqartoq
Savaatillit ullumikkut 35-nik amerlassuseqarput, taakkualu Neqi A/S-imut savaaqqanik ukioq kingulleq tunisaqartut amerlaqatigaat. Savaateqarfiit tallimat 2013-ip kingorna assigiinngitsunik pissuteqarlutik matusimapput, savaatillillu arfinilissaat nersussuaateqarnerinnamik ingerlatsilersimalluni.
Sermitsiami uani sapaatip-akunnerani saqqummertumi allaaserisaq tamaat atuaruk. Aviisi aamma uani pisiarineqarsinnaavoq: