nukissaq ataavartoq
Savaateqarfiit aamma "guest farm"-ip nukissaq mingutsitsinngitsoq atorpaat
Nunani tamalaani silap pissusianik suleqatigiinneq pillugu Kalaallit Nunaat Danmarkilu qanimut oqaloqatigiipput. Kim Kielsenip Rasmus Helveg Petersenillu Kujataani nukissamik mingutsitsinngitsumik atuineq takuvaat
Avatangiisinut Pinngortitamullu Naalakkersuisup Kim Kielsenip aamma danskit Silap Pissusianut, Nukissiuuteqarnermut Illuuteqarnermullu Ministeriata Rasmus Helveg Petersenip ullumi ulluni pingasuni Kalaallit Nunaata kujataanut tikeraarnertik naammassissavaat. Tikeraarneq Rasmus Helveg Petersenip Kalaallit Nunaannut tikeraarneranut, sapaatit akunneranni kingullermi Ilulissani aallartinneqartumut ilaavoq. Taamatut allapput namminersorlutik oqartussat tusagassiorfinnut nalunaarutikkut.
– Rasmus Helveg Petersenip pilersitsiviulluartumik oqaloqatiginera, aammalu ilaatigut silap pissusianik ilisimatusarnermi nunanilu tamalaani silap pissusia pillugu isumaqatiginninniarnerni suleqatigiinnitsinnik ineriartortitsinissamut ataatsimoorluta soqutiginnilluarnerput iluarisimaartorujussuuara, Kim Kielsen tikeraarnerup kingorna oqarpoq.
Ministereqatigiit marluullutik Kalaallit Nunaata kujataaniinnerminni ilaatigut Narsarsuup eqqaani savaateqarfiit pulaarpaat, aammalu najukkani seqernup qinngornerinik, imermik anorimillu nukissiornermut atorluaanerinut assersuutissanik takusaqarlutik.
Savaateqarfik tikeraartitsisartoq Ipiutaq seqernup qinngorneri anorilu atorlugit nukissiuutinik ineriartortitsiviuvoq, aammalu Issormiuni savaateqarfik ukiorpassuarni erngup nukinganik nammineerluni atukkaminik misilittagaqarpoq.
Sumiiffinni marluusuni nukissiuutinik ataavartunik atuinermi ikummatissanik atuinerit annertuumik annikillisinneqarsimapput. Kalaallit Nunaata kujataani savaateqarfiit arlallit erngup nukinganik seqernullu qinngornerinik atuisuupput, arlallillu anorip nukinganik innaallagissiornermik misileraallutik. Nunalerinermi Siunnersuisarfiup naliliinera malillugu savaateqarfik nukissiuutinik ataavartunik atuisoq ukiumut ikummatissamut 70-120.000 koruuninik sipaagaqarsinnaavoq, namminersorlutik oqartussat tusagassiorfinnut nalunaarutikkut paasissutissiipput.
– Nukissiuutinik ataavartunik atuinermut assersuutissat, Kalaallit Nunaata kujataani takusatta takutippaat, ataasiakkaat nukissiuutinut ataavartunut aningaasaliisarnerat imminut akilersinnaasoq, Kim Kielsen tikkuaavoq.
Ministerit marluullutik Kalaallit Nunaata kujataanut tikeraarnertik naggaserlugu Qassiarsummi Nunataatsimiipput, tassanilu ilaatigut Kalaallit Nunaata silap pissusianik ilisimatusarnerit pingaarutillit, kiisalu silap pissusia pillugu ataatsimeersuarnissap, ukioq manna decembarimi Perumi ingerlanneqartussap tungaanut suleqatigiinnissaq oqaluuseraat, tusagassiorfinnut nalunaarummi allassimavoq.
Tikeraarnerup nalaani Rasmus Helveg Petersenip Jens-Erik Kirkegaardillu avatangiisinik ilisimatusarnermi suleqatigiinnissamik isumaqatigiissut atsiorpaat.