Satellitsi kujataata qulaatigoorluni naggataarpoq
Canadamiut radarsatellitsiat Radarsat-1 marsip 29-anni assinik kingullerpaanik Uummannarsuarmut nassiussivoq. CSA-p satellitsi atorsinnaajunnaartutut isigaa
Satellitsi ukiuni tallimaannarni paasissutissanik pilersuisussatut sananeqarsimavoq, ukiulli 17-it sinnerlugit atuuppoq atorunnaarnissami tungaanut.
- Radarsat-1 qularnanngitsumik iluatsilluartorujussuusimavoq satellitsinullu allatut taamatut ittunut maligassiuisuulluni, Keld Qvistgaard, DMI-p sikusiortarfianeersoq oqarpoq.
Radarsat-1 nunarsuarmi sikusiornermi nutaaliorluinnarsimavoq. CSA-p 1995-imi satellitsimik taassuminnga qullartitsinnginnerani sikusiortartut, DMI-p Nunatsinni sikusiorfia ilanngullugu, ukiuni qulikkaani timmisartut atorlugit immani sikulinni umiarsuarnut paasissutissanik katersisarsimapput.
Satellitsip qullartinneqarnerata kingorna DMI Narsarsuarmilu sikusiortarfik annertunerusumik inerisaalerput:
- Satellitsi atorlugu umiarsuarnut immap sikuanik nakkutilliinermi periarfissat aporfiusinnaasullu qulaajarniarsimavagut - sallerpaatillugu kujataata imartaani tusaamanerlutami, Keld Qvistgaard oqarpoq.
Immani mallerajuttuni sikunut paasissutissat aalajangiisuusut
Radarsat-1 Canadap satellitsinik nunamik nakkutilliisuisa siullersaraat, nunarsuullu immallu maniinnersaannik scannerinissamut radareqarluni nutaaliaalluinnartumik. Satellitsimut atapput nunami stationeqarfiit, satellitsip qulaaffigisaani paasissutissanik tigooraallutillu suliarinnittartut akunnialunnguillu qaangiuttut ingerlatitseqqittartut.
- Satellitsip immap sikui ilulissallu scannertarpai sila qanorluunniit ikkaluartoq, sikunillu paasissutissanik umiarsuarnut immani sikoqarfiusuni angalasunut pilersuisarluni, Keld Qvistgaard oqarpoq.
Satellitsit nutaat
Europamiut satellitsiat Envisat radarikkut paasissutissanik pilersuivoq ukiouni 2002-miit 2012-imut, Radarsat-2-lu 2007-imi qullartinneqarpoq.
- 2008-miilli DMI-p umiarsuarnut sikunut paasissutissanik pilersuinermini Radarsat-2 pingaarnerusumik atorsimavaa - taannalu kisimiinngilaq, Keld Qvistgaard oqarpoq nangillunilu:
- Tyskit piat TerraSAR-X-konstellation (satellitsit marluk) italiamiullu piat CosmoSkyMed-konstellation (satellitsit sisamat) satellitsinut Radarsat-inut eqqaanarput. Piffissamulli sivikitsumut atorneqarsinnaanngillat, tassa paasissutissanik pilersuinerat sivisunerungaatsiarmat. Radarsat-1 atorunnaarmat tamakkua DMI-p satellitsikkut paasissutissanik pilersuinerani annertunerusumik atorneqalissapput Radarsat-2-mut ilapittuutitut, satellitsit nutaat tamatumunnga atorneqartussat qullartinneqarnissaasa tungaanut.
Ukiut tulliuttut sisamat-tallimat ingerlaneranni Det Europæiske Rumagenturip ESA-p ´Sentinel satellitsinik´ taaneqartut marluk radarsat-imik atortullit qullertissavai. CSA-p aamma Radarsat-3-konstellation atulerniarpaa, taannalu pingasunik satellitseqarpoq.
- Satellitkonstellationit tamakkua atulerpata Radarsat-2 umiarsuarnut sikunik paasissutissanik pilersuinermi pingaarnerusutut atorneqassaaq, italiamiut satellitsiinit paasissutissat paasissutissallu akeqanngitsut allat Metop-imeersut, MODIS-imeersut NPP-meersullu ilanngullugit, Keld Qvistgaard oqarpoq.
Allaaserisaq una ilanngunneqarpoq DMI isumaqatigiissuteqarfigalugu. Oqaluttuaq Marianne Brandtimit allanneqarsimasoq dmi.dk-mit tiguneqarpoq. Taanna dmi.dk-mi allaaserineqarpoq maajip 16-ianni.