Sarfaq Ittuup Kujataanut angalanissani taamaatippaa

Sapaatip akunnerani uani kujataani silarlunnissaa aarlerisaarutigineqarmat Sarfaq Ittuk Nuummiit Qaqortumut angalassanngilaq. Umiarsuaatileqatigiiffik Arctic Umiaq Line taama ilisimatitsivoq.

Umiarsuaatileqatigiiffik silarlunnissaanik aarlerisaarutit tunngavigalugit aaliangerpugut kujataanut angalanissaq taamaatiinnarneqassasoq, ilaasut ilorrisimaarnissaat eqqarsaatigalugu, aammalu kinguaattoorujussuarnissap ilimanaateqarnera pissutigalugit, kinguaattoorneq ilaasunut amerlasuunut sapaatip akunneri arlerlugit sunniutilimmik eqquisinnaammat. Arctic Umiaq Line tusagassiuutinut nalunaarummi taama ilisimatitsivoq.

- Sarfaq Ittuk Nuummut tikissaaq marlunngorpat ullaakkut, Nuummiiginnassallunilu tallimanngornerup unnukkuata tungaanut, tassanngaanniillu naatsorsuutigineqarluni pilersaarutit malillugit avannaanut ingerlaarluni aallarnissaa, umiarsuaatileqatigiiffik allappoq.

Ilaasut eqqugaasut toqqaannartumik attaveqarfigineqarumaarput, attaveqarfissatut paasissutissat tunniussaat eqqortuuppata, Arctic Umiaq Line ilisimatitsivoq.

Powered by Labrador CMS