Sarfaq Ittuk Arsuup kujataani uninngavoq
Siku anorilu pissutaallutik sinersortaat Sarfaq Ittuk Arsuup kujataani uninngavoq, tassani umiarsuup sinersortaatip siku pitsanngornissaa utaqqivaa
Torsukattammi siku anorilu pissutaallutik, Sarfaq Ittuk kinguaattooqqavoq maannalu Arsuup kujataaniippoq.
Arctic Umiaq Line taama nalunaaruteqarpoq.
- Siku anorilu pissutaallugit Sarfaq Ittuk inissisimaffimminiiginnarallarpoq. Silassaq maanna pigisarput aallaavigalugu suli nalunarallarpoq, Sarfaq Ittuk qaqugu ingerlaqqissinnaassanersoq. Tamanna isumaqarpoq naatsorsuutigineqarsinnaasoq Sarfaq Ittuup suli kinguaattooqqinnissaa, Arctic Umiaq Line taama nalunaaruteqarpoq.
Sarfaq Ittuk uani inissisimavoq:
Sumiiffik mobilikkut attaveqanngitsoq
Arctic Umiaq Linep nalunaarutaa naapertorlugu, Sarfaq Ittuup inissisimanera mobilikkut attaviit avataanniippoq, taamaattumillu ilaasut ilaquttaminnut attaveqarsinnaanngillat.
- Umiarsuup naalagaa nalunaarpoq ilaasut tamarmik ajunngitsut aammalu ernumanartoqanngitsoq.
Ilaasussat billetsimik pisereersimasut kinguaattoornermillu eqqorneqartussat immikkut toqqaannaq attavigineqarumaarput.