Sarfannguit nunarsuarmioqatigiinnut kingornussassanngorneq nalliussivaat

- Nunaqarfitta Sarfannguit nunarsuarmioqatigiit kingornussassaattut ilanngunneqarnera nuannaarutigisorujussuuarput, tulluusimaarnaqaaq peqataaffigalugu, nunaqarfimmi aqutsisut siulittaasuat oqarpoq.

Borgmesteri Malik Berthelsen aamma nunaqarfimmi aqutsisut siulittaasuat Paarnannguaq Jonathansen kingornussassanngortitsineq nuannaarutigaat.
Borgmesteri Malik Berthelsen aamma nunaqarfimmi aqutsisut siulittaasuat Paarnannguaq Jonathansen kingornussassanngortitsineq nuannaarutigaat. Qeqqata Kommunia Qeqqata KommuniaBorgmesteri Malik Berthelsen aamma nunaqarfimmi aqutsisut siulittaasuat Paarnannguaq Jonathansen kingornussassanngortitsineq nuannaarutigaat. Qeqqata Kommunia Qeqqata KommuniaBorgmesteri Malik Berthelsen aamma nunaqarfimmi aqutsisut siulittaasuat Paarnannguaq Jonathansen kingornussassanngortitsineq nuannaarutigaat. Qeqqata Kommunia Qeqqata Kommunia

Qeqqata Kommuniani borgmesteri, Malik Berthelsen, qiimmatsalluni nuannaartoq, Sarfannguani innuttaasunit tikilluaqquneqarpoq, tassani kaffisortitsinissamut qaaqqusinikuugami.

- Nunarsuarmioqatigiinnut kingornussassanngortinneqartumi Sarfannguit kisartaalluni inoqarfiusuusoq, Aasivissuit - Nipisat nunataani tamarmiusumi, takornariaqarnermut periarfissarujussuartut ilanngunneqarpoq. Sumiiffimmi inuussutissarsiornermut - takornarialerinermuinnaagani nalinginnaasumilli - nukittorsaataassasoq nalorninanngilaq.

- Annerpaamik naatsorsuutigisamut naammassinnittumik nunarsuarmioqatigiinnut kingornussassamik pilersitsiniarluta, Sarfannguani innuttaasut, sumiffimmilu takornarialerisut suleqatigalugit Aasivissuit - Nipisat annertusarneqarnissaanut qilanaarpugut.

– Soorluttaaq Kangerlussuup Sisimiullu akornanni pisuttunut aqqummik naleqqanik inaarsaaqqammersugut, taamalilluni Sarfannguit aqqusaarneqarsinnaanngorlugit, taamaattumik Sarfannguani innuttaasut takornarissanik tigusinissamut piareersimasaqariaqarput, takornarissallu inuunerminni puigugassanngisaannik kulturikkut misigisassanik misigisaqartitsillutik - maanimi Sarfannguani pinngortitarsuarmi qanittumiittumi piniarnermut kulturitsitut suli aalisarlusilu piniariartarassi.

Kaffillernerup nalaani ilaatigut Sarfannguani/Itillimi nunaqarfinni aqutsisut siulittaasuat Paarnannguaq Jonathansen oqalugiarpoq,

- Nunaqarfitta Sarfannguit nunarsuarmioqatigiit kingornussassaattut ilanngunneqarnera nuannaarutigisorujussuuarput, tulluusimaarnaqaaq peqataaffigalugu. Qaqugumulluunniit tulluusimaarutigiuassavarput kinguaassatsinnullu nunaqarfitta taamatullu inooriaatsip atukkatta siulittalu atorsimasaasa ingerlaannarniissaa ingerlateqqissavarput, taanna oqarpoq.

- Tamassilu maanga tikittusi immikkut tikilluaqqorusuppassi, suliamullu matumunnga annertuumik suliaqarsimanissinnut qujarusuppunga, Qujanaq. Naggataatigut nunaqarfitsinnut Sarfannguanut kikkut tamaasa tikilluaqqorusuppagut, nunallu immikkoortuanik ineriartortitseqataanissatsinnut qilanaarpugut.

Sisimiut Kangerlussullu akornanniittoq Aasivissuit – Nipisat 4.000 kvadratmeteringajammik nunataqarpoq, ukiullu 4.500-it matuma siornanit manna tikillugu inuit Kalaallit Nunaannut takkussimanerinik uppernarsaataallutik qanganitsanik eqqaassutissaqarlunilu illukorpaaloqarpoq.

Ukiuunerani imaani miluumasunik soorlu puisinik, aarrinik aamma arfernik piniartarnermi ikiiviusarsimasut qeqertaniipput, nuunnguaniipput kiisalu Aasivissuit - Nipisat kitaatungaanni ikkarloqarfimmiillutik, upernaakkullu ammassanniarnermi eqarlunniarnermilu tupeqarfiit kangerlunni ilorpasinnerusumiillutillu kangerluit paavaniinnerullutik. Ukiarsalernerani ukiakkullu nunap timaani piniartarput, tassani piniarnermut atortunik ujaqqanik sanaanik atortoqarlutik ataatsimoorlutik piniartarlutillu tuttorpassuarnik pisaqartarput.

UNESCO-mut qinnuteqaat, FN-ip ilnniartitaanermut, ilisimatusarnermut, kulturimut ingerlatsisarnermullu kattuffianiittoq, Kultureqarnermut ministeriap, Namminersorlutik Oqartussat, Qeqqata Kommmuniata aamma Nunatta Katersugaasiviata akornanni suleqatigiinnikkut pilersinneqarpoq. Suliap suliarineqarnerani arlaleriarluni innuttaasunik ataatsimiisitsisoqarnikuuvoq, piniartunillu nunaminertamilu soqutigisalinnik allanik ataatsimeeqateqartoqartarnikuulluni.

Nunarsuarmioqatigiit kingornussassaasa allattorsimaffianiilerneq ulloq taanna Kangerlussuarmi nalliussineqarpoq, juulillu arfernani Sisimiuni katersugaasivimmi nal. 15:00 kaffillerluni nalliussineqassalluni.

Powered by Labrador CMS