Sarap tunuarnermini tunngavilersuuatai Kimip paasisinnaanngilai

Sara Olsvigip tunuarnermini politikkimi sulinermi silaannaq pillugu isornartorsiuinera, Naalakkersuisut Siulittaasuata Kimi Kielsenip paasisinnaanngilaa. - Taasinerit tamarmik pimoorunneqartarput, Kim Kielsen naqissusiivoq.

Inuit Ataqatigiit siulittaasorisimasaata Sara Olsvigip politikkimit tunuarnermini politikkimi silaannaap ajornera arlalitsigut tunngavilersuutigaa.

Assersuutit:

  • Kikkut tamarmik imminnut akerleriipput
  • Pissaaneqarniuunnerit pissaaneqarnermillu takutitsinerit
  • Oqaloqatigiinnerit, tunngavilersuinerit, peqqissaarussinerillu – suliani amerlavallaartuni taaneqartut pingasut amigaataapput, taamatullu peqataasinnaajunnaarpunga

Sara Olsvigip politikkimit tunuarnissaminik tusagassiortunik ataasinngormat katersutsitsinermini tunngavilersuutigisai, Kim Kielsenip ilisarisinnaanngilluinnarpai.

Isumaqatigiinneq puigornagu

- Taasinerit tamarmik pimoorunneqartarput. Siunnersuutigineqartut qassit amerlanerussuteqartunit isumaqatigineqartarnerat maluginiarneqartariaqarpoq. Inatsisartuni siunnersuutigineqartut 85 procentii amerlanerussuteqarluartunit akuersissutigineqartartut naatsorsuutigaara. Siunnersuutineqartullu 15 procentii isumaqatigiissutigisinnaannginnatsigit imaaginnarpoq politikkimi suliaqarnermi piviusoq, Kim Kielsen naqissusiivoq erseqqissaallunilu:

- Partiit tamarmik assigiinngitsunik suliniuteqarput isummersuuteqarlutillu, ilaanni isumaqatiginngilluinnarsinnaasatsinnik. Tamat oqartussaanerat malillugu politikkikkut ingerlaaseq taamaaginnarpoq, Kim Kielsen oqarpoq, siunnersuuteqartoqarneraniillu suliap naammassinissaata tungaanut partiit tamarmik inatsisartut ataatsimiititaliaanni sulinerminni sunneeqataasinnaanerat ilanngullugu tikkuarlugu.

Oqallinneq tulluartoq

Politikkimi oqallittariaaseq pitsaasuusoq, inatsisartunilu oqaluttarfimmi partiit isumaqatigiinngissinnaanerat inissaminiittoq Kim Kielsen isumaqarpoq.

- Kaffesortarfimmili partiit assigiinngikkaluarlutaluunniit tamatta naapittarpugut. Tassanilu torersumik nuannersumillu oqaloqatigiissinnaanerput misigisarpara, Kim Kielsen oqarpoq.

- Taamatut oqaloqatigeerujoornerni, Inatsisartuni sulinermi nalinginnaasuni, Sara Olsvig akuttusuunik peqataasartoq maluginiartarpara. Ilanngulluguli eqqaarusuppara Inatsisartuni oqallinnermi Sara Olsvig piareersarluarsimalluni takkuttarmat, Kim Kielsen naqissusiivoq.

Powered by Labrador CMS