Sarap tunuarnera: - Inuttut, nunatut ingammillu politikkimi arnamik annaasaqarpugut

Sara Olsvigip politikkimit tunuarniarluni aalajangernera paasinninnermik aamma ugguarnermik tiguneqarpoq. Taassuma uisitsiniarnera pimoorussilluni tiguneqartariaqartoq, arlallit isumaqarput.

Sara Olsvigip ippassaq politikkip ullumikkut ingerlanneqarnera naammatsiffigalugu nalunaaruteqarnerata kingorna, Sara Olsvigip nammineq aalajangerneranut paasinnittoqarlunilu aamma nunatsinni politikkimut tunngatillugu ugguartoqarpoq, tamanna oqaaseqaateqartarfinni malunnarpoq.

- Assaaa ajoq, emojimik qiasumik malitsilimmik taama allattoqarpoq, amerlasuut taamatut qisuariarunarput.

- Alianarlunilu paasinartorujussuuvoq. Qujanaq kusanartumik naammassinninnernut, siunissamilu suliffissanni iluatsitsilluarina, alla taama allappoq.

Politikkikkut kulturimik isornartorsiuinera pimoorullugu tiguneqartariaqartoq, allat oqariartuutigaat.

- Maanna politikkikkut ingerlaneq ilittut ittunut tulluanngilaq, akaarnaappallaarlunilu amigartumik piginnaaneqarfiuvoq, inuit imminnut suleqatigiinnatik appisaluuttaaginnartut, ataaseq taama oqaaseqaateqarpoq.

Politikkikkut inuuneq aamma misissorneqartariaqartoq, IA-p Kommuneqarfik Sermersuumi kommunalbestyrelsimut ilaasortaatitaa, Inge Olsvig Brandt isumaqarpoq.

- Eqqarsaatissiivoq. Politikeri nukittooq ataqqinartoq aamma politikkikkut piginnaasaqarluartoq tunuartillugu, taava tamatta unikaallalluta inuiaqatigiinni immitsinnut qanoq pisarnerput nalilersussallugu tunngavissaqarpugut, aamma politikkikkut.

Suleqatigiissitsisuni siulittaasup tullia, Tillie Martinussen, Sara Olsvig maqaasiumaarlugu allappoq.

- Piginnaanilissuaq maanna politikkimit tunuarpoq. Inuttut, nunatut ingammillu arnamik politikkimik suliaqartumik annaasaqarpugut. Sarap aalajangernera ataqqilluinnarparput, kisianni tamanna tungnavigalugu aalajangerneqarnera ajuusaarutigaarput. Uggornaq.

- Sara Olsvig siunissami sunik tamanik pitsaasumik kissaapparput, sulilluarneranullu qujalluta – uagullu ikinnerussuteqartugut ataatsimiititalianut kinaassusersiorani torsersumik ilaatimmatigut, aamma tamanik ilaatitsinissamik, ikinnerussuteqartunik aamma arnat ikinnerussuteqarnerat pillugu oqariartuuteqartarneranut, taanna allappoq.

Taassuma oqaaseqaataa IA-mi Folketingimut ilaasortamit Aaja Chemnitz Larsenimit aamma Kristjana Gudmundsdóttir Motzfeldtimit taperserneqarpoq.

Nuummi Inuit Ataqatigiinni siulittaasuusimasoq, Vivi Vold, angutit pissaaneqarnerannut tunngatillugu suli ersarinnerusumik oqaaseqaateqarpoq.

- Politikki pissaarnermik atornerluiffiusoq angutinik inuttaqarnerusoq maanna qimatat ernumassutigisorujussuuara. Qanoq iliortoqartariaqarneranik takutitsinikuuvutit – ingerlatsineq appasippallaaqaaq – maannakkullu aamma appasinnerulerpoq, taanna Facebookimi allappoq.

Sara Olsvig ukiuni kingullerni Inuit Ataqatigiinni arnani nuimasuni politikkimit tunuartuni siulliunngilaq. Aningaasaqarnermut naalakkersuisuusimasup Maliina Abelsenip 2013-imi Inatsisartunut qinersisoqarnerata kingorna tunuarpoq. Folketingimut aamma Inatsisartunut ilaasortaasimasoq Juliane Henningsen 2015-imi tunuarpoq. Aamma Inatsisartuni ilaasortaq nuimasup Naaja Nathanielsenip siullermik IA-mit tunuaqqaariarluni 2016-imi Inatsisartunit tunuarpoq.

Sara Olsvigip Folketingimi suleqatikua, Enhedslistenimeersoq Line Barfod aamma inuulluaqqussuteqarpoq.

- Asasara Sara. Ukiorpassuarni suliarpassuarnut qujanaq. Suleqatiginerit aamma torersumik politikeriunerit naleqartittorujussuuara. Neriuppunga tamanna allanut isumassarsiffiusinnaassasoq, taanna allappoq.

Powered by Labrador CMS