Sarap imaaliallaannaq Naalakkersuisooqataalernissaq angorusunngilaa

IA Siumumik Naalakkersuisooqataalernissamut anguniagaqanngilaq. Kim Kielsenimut isornartorsiuisoqarportaaq

Siumut aamma Kim Kielsen annaanniarlugit Inuit Ataqatigiit Naalakkersuisunngortitsiniarnissamik anguniagaqanngilaq, tamanna tusagassiutinut nalunaarummi atuarneqarsinnaavoq.

Tusagassiutinut nalunaarummi Kim Kielsen kiisalu aqutsiseriaasaa isornartorsiorneqarput.

- Takusagut naapertorlugit Kim Kielsen kisermaassilluni, akuliutsitsinani, ataqatigiissaarinanilu aqutsivoq, naalakkersuisooqatiminik attaveqarniartuunngilaq minnerunngitsumillu tunuliaquttaminik ataatsimoortitsinnaassuseqarani. Tamakku 2016-2018-mi naalakkersuisooqataanitsinni uatsinnut ajornartorsiutaasimasut Naalakkersuisooqataaleraluartunut ingerlaqqiinnarsimarpasipput, IA-mi siulittaasoq Sara Olsvig allappoq.

- Aqutseriaatsimut taamaattumut ilanngunnissarput kissaatiginngeqaarput.

Isumaqatiginninniarnissamut IA ammasoq naqissuserpaa, tamannali angusaqarfiungaarnissaa naatsorsuutiginngilaa.

- Ukiut tallimassaat ataannartumik nunatta politikikkut aqunneqarnera patajaassuseqarsimanngilaq. Tamanna arlaannaannulluunniit iluaqutaanngilaq. Inuit Ataqatigiit patajaassuseqanngitsumik ingerlatsinerup nanginnissaa ilaaffiginiarunnanngilarput.

- Qaammatit sisamaannaat matuma siorna naalakkersuisooqatigiinnissaq pillugu Siumut kingullermik isumaqatiginninniaqatigivarput. Taamanikkut massakkullu Siumumi aqutsilluartoqarsorinngilarput. Partiip iluani assortuuttoqarpoq eqqissiviilliorfiujuarlunilu. Tamannalu ajornartorsiutip qiteraa, pissutsillu taamaannerat pissutigalugu naalakkersuisooqataalernissamut pilerinngilagut.

Demokraatit siulittaasuata, Niels Thomsen-ip Sermitsiaq.AG-mut uppernarsarpaa Kim Kielsen-imit attavigineqarsimalluni, taamaakkaluartorli Thomsen-ip pisut eqqissilluni tiguai; naatsorsuutigineqassanngilaq partiip naalakkersuisooqatigiinnut kivisimasunut annaassiniartussatut isumalluutaanissaa.

- Naalakkersuisut siulittaasuat ataatsimoorfiulluni iliuuseqarsinnaassuseqarnerminik takutitsisinnaasariaqarpoq, nunatta aqunneqarnera pillugu erseqqissumik siunnerfilersortariaqarpoq, tassami arlaannaannulluunniit iluaqutaanngilaq pisut qaangiataaginnarlugit ingerlatsiniarsarineq, taamatut ingerlatsisoqassappat tamanna innuttaasunut sumiginnaaneruvoq, Niels Thomsen (D) sapaatiummat oqarpoq.

Suleqatigiissitsisuniit Tillie Martinussenimit neriuutigineqarpoq Demokraatit, Inuit Ataqatigiit, Suleqatigiissitsisut aamma Atassut Naalakkersuisooqatigiilissasut. Atassut taamaasilluni suleqatini allanngortittariaqassavai, tamanna ilimananngilaq paasisat kingulliit naapertorlugit, aamma Kim Kielsenip qinersititsinissamik suaaruteqannginnissaa taamaasiortoqassappat kisimi iluatsinnaassaaq.

Powered by Labrador CMS