Sara Olsvig: Pitsaanerusumik periarfissaqarpoq

Inuit Ataqatigiit allatut amerlanerussuteqalersitsinissamut periarfissat ujartorniarpaat - kisianni aamma illuatungiliuttutut sulinissaminnut piareersimapput. Siumup ikinnerussuteqarluni naalakkersuisuunissami taperserneqarnissani naatsorsuutigissanngilaa.

Inuit Ataqatigiinni siulersuisuunerit tamarmik isumaqatigiittut ullaap tungaani Siumut naalakkersuisoqatigiinnissamik isumaqatiginiarnerinik unitsitsinissaq aalajangersimavaat.

Isumaliutersuuteqarnerit arlallit ataatsimiinnerillu kingorna Siumup tallimanngormalli marloriarluni ataatsimeeqatiginerata kingorna aalajangerneq pivoq.

- Ammalluta isumaqatiginninniarnernut iserpugut, ammanerusumillu ataatsimeeqatiginninnissarput naatsorsuutigisimagaluarparput, IA-mi siulittaasoq Sara Olsvig, Sermitsiaq.AG-mut taama oqarpoq.

Aporfiit pingasut

Siumup iluani ingammik aalisarnermut inatsit pillugu isumaqatigiittoqannginnera ilaatigut taakkartorpaa, taanna naapertorlugu Siumup kikkut isumaqatiginiarnerai tamatuma paasiuminaallisippaa.

Aappaattut taassuma isaanit Siumup tungaanit naalakkersuinikkut matoqqasumik ingerlatsineq taakkartorpaa.

- Tamatumunnga tunngatillugu toqqissiallaatigisassatsinnik tusagaqarnissarput naatsorsuutigisimagaluarparput. Tamannalu tusanngilarput, taanna oqarpoq.

- Pingajuat siullernut marlunnut attuumassuteqarpoq: Pitsaasumik naalakkersuisoqarnissaa piumasaraarput, aamma innuttaasut inuiaqatigiillu akornanni toqqissimasoqarnissaa piumasaralugu. Pitsaasumik naalakkersuinermik ingerlatsinissap kissaatigisatta, Siumumi nassaarinavianngikkipput isumaqatiginninniarnerit takutippaat.

Allatut amerlanerussuteqarnissaq ujartorniaraat

- Maanna naalakkersuisunut annaasisuunissarsi kissaatiginnginneranik nalunaaruteqarnersi aamma Siumup siuttuuffigisaanik ikinnerussuteqarluni naalakkersuisuutitaqarnissamut atatillugu atuutissava?

- Isumaqarpunga nalunaaruterput ersarittorujussuusoq: Aqutsineruna qularigipput. Inuiaqatigiit innuttaasullu allanngujaatsuunissaq pisariaqartikkaat isumaqarpugut, maannalu naalakkersuisoqatigiit tamanna tunniutinngikkaat isumaqarpugut.

Inuit Ataqatigiit taarsiullugu allatut amerlanerussuteqarnissamik ujartuiniarput. Taassumali periarfissarsiornerit pisimasut qanoq aalajangersimatiginersut oqaatigerusunngilaa.

- Siornatigut oqaatigeriikkattut, partiimi siuttut allat uannik oqaloqatiginnikkusuttut oqaloqatigaakka. Pitsaanerusumik nassaartoqarsinnaasoq isumaqarpugut aamma partiit allat piumappata periarfissat oqaloqatigiissutiginissaannut piareersimavugut.

Allatut amerlanerussuteqarneq piviusunngussappat, aallaqqaammut Demokraatit illuatungiliuttut annerit aappaattut taamatut naalakkersuisoqatigiinnermut peqataanissaat pisariaqartinneqassaaq. Kisianni Suleqatigiissitsisunit taperserneqaraluarlutilluunniit, Inatsisartuni 31-ni amerlanerussuteqalissagunik, partiimit allamit taperserneqarnissartik pisariaqartissavaat.

- Nunatsinni naalakkersuinikkut ingerlatsinermut atatillugu unneqqarinnerunissamut aamma peqqissaarnerunissamut tapersiisut partiit arlaliuvugut.

- Uannit isigalugu periarfissaqarpoq, kisianni ilisimaneqareersutut Inuit Ataqatigiit 16-nik ilaasortaatitaqarluta amerlanerussuteqanngilagut.

Illuatungiliuttutut ingerlaqqinnissaminut aamma piareersimalluni, Sara Olsvigip naqissuserpaa.

Powered by Labrador CMS