tamanut ammasumik ataatsimiititsineq
Sara Olsvigip uumissuisarnerit akiorusuppai
Uumissuilluni oqaaseqartarnerit qanoq pinngitsoortinneqarsinnaappat? Tamanna apeqqut Naalakkersuisoq Sara Olsvigip sammerusuppaa Nuummilu tamanut ammasumik ataatsimiisitsinissamut tamanut aggersaalluni.
- Kinaluunniit uumissuisumik oqarfigineqarani inuiaqatigiinni peqataasinnaasariaqarpoq, Isumaginninnermut, Ilaqutariinnermut, Naligiissitaanermut Inatsisinillu Atuutsitsinermut Naalakkersuisoq, Sara Olsvig, oqarpoq.
Kikkulluunniit peqataasinnaasut
Tamanut ataatsimiititsineq Katuap inersuaaraani sisamanngorneq 23. november 2017 nal. 16.00 - 17.30 tugaanut pisussami taanna aaqqissuisuusoq, tusagassiuutinut nalunaarummi allassimavoq.
- Tamanut ataatsimiititsinermi siunertaavoq uumissuisumik oqaluttarnerit qanoq ililluta pinngitsoortissinnaanerivut qitiutillugit sammissallugit. Kinaluunniit kikkut tamarmik isersimaffigisinnaasaanni uumissuisumik oqarfigineqarnani peqataasinnaasariaqarpoq, Sara Olsvig oqarpoq.
Norskit misilittagaat
Tamanut ataatsimiititsinermi Unni Mathisen norskit Børne- og Ligestillingsministerium-ianeersoq tamat isersimaffigisinnaasaanni uumissuisumik oqaluttarnerit akiorniarlugit Norgemi qanoq iliortoqartarneranik oqaluttuassaaq. Assersuutitullu uumissuisumik oqaluttarnerit akiorniarlugit Norgemi 2016-2020-mut periusissamik atuisoqalersimavoq, tassaniippullu iliuusissat suliniutissallu arlaqartut, taakkunanilu pisortani oqartussaasut arlallit assigiinngitsut peqataatinneqarput.
- Nuannaarutigaara uumissuilluni oqaluttarnerit akiorniarlugit Norgemi qanoq iliortoqartarnersoq paasissallugu periarfissaqalersimagatta. Tamannalu tamatsinnut isumassarsiorfiulluarsinnaavoq, Sara Olsvig oqarpoq.
Sammisami pineqarput
Uumissuisumik oqaluttarnerit (imaluunniit uumissuilluni oqalugiarnerit) tassaapput inunnut, soorlu internet aqqutigalugu, uumissueqquserpalaartumik siammarterisoqarnissaanut kaammattuinerit, assersuutigalugulu suiaassutsimut, oqaatsinut, suminngaanneernermut, upperisarsiornermut, inuunermut isiginneriaatsimut, atoqatigiittarnermut samminninnermut, suiaassutsikkut kinaanermut, piginnaasat annikinnerulersimanerannut, ukiunut, naalakkersuinikkut isummersortarnermut inuiaqatigiinnilu inissisimanermut tunngasinnaallutik. Uumissuisumik oqaluttarnerit assigiinngitsorpassuusinnaapput aamma naqissusiisinnaapput, nikanarsaasinnaapput, tatisimannissinnaapput, peqqusiileqititsisinnaapput siorasaarinerusinnaallutillu. Assersuutigalugu tassaasin-naapput saqqummersitatigut oqaaseqaatit, Facebook imaluunniit oqallittarfiit allat aqqutigalugit saqqummiunneqartut.
Katuami ataatsimiinneq nunani avannarlerni naligiissitaanermik naalakkersuinikkut suleqatigiinnerusoq, tusagassiuutinut nalunaaarummi allassimavoq.