Sara Olsvigip qinersinerup inernera pakatsissutigaa
IA aqqanilinnik ilaasortaatitaqarsimasoq arfineq-pingasunik ilaasortaatitaqalerpoq. Ilimaginngisamik ajorsarneq. Siulittaasorli siulittaasuuginnassaaq
- Ullumi siulittaasuuvunga aqagulu aamma siulittaasuussaanga.
Inuit Ataqatigiit siulittaasuat Sara Olsvig, marlunngormat partiip qinersisoqarnerani Inatsisartuni gruppiani pingasunik kinguariaateqarnerisa kingorna taama oqaluttuarpoq.
- Pitsaanerusumik angusaqarnissaq neriuutigisimangaluarparput, partiillu taama annertutigisumik kinguariaateqarsimanera uanga akisussaaffigaara. Aap inuttut qinersisinnik aamma ikiliaaateqarpunga. Ingammik Nuummi qinersisartugut annaasaqarfigaagut. Tassani qinersisartut Demokraatinut nuussimapput taamaasillutalu nuna tamakkerlugu kinguariaateqarluta, Sara Olsvig IA-p Inatsisartuni ilaasortaatitaanut arfineq-pingasunut siuttuusussaq, oqarpoq.
Ajorsaraluarluni partiip qineqqusaarnermi oqaluuserinneqataalluarnera nuannaarutigaa. Ingammik inuiaqatigiit ammanerusumik peqataatinneqarnissaat pillugu.
- Tamatta inissaqarnissarput pingaaruteqarpoq. Tamanna sulissutigisimavarput partiinillu allanit tigulluarneqartoq, Sara Olsvig oqarpoq qinersinerullu inernerani talerpimmut sangoriartoqarsimanera ersiutaasoq, ingammik inuusuttunit qinersisartunit.
Demokraatit marlunnik ilaasortaatitaqalerlutik siuariarput. Atassutip ilaasortaatitani marluk pigiinnarpai. Suleqatigiissitsisullu ataatsimik ilaasortaatitaqarlerlutik iserput.
IA-p siulittaasuata qinersinerup inernera tupaallaatiginngilaa.
- Inernerisinnaasut tamaasa piareersarfiginikuuakka. Inatsisartunili arfineq-marlunnik parteeqalernera soqutiginarpoq. Tamanna siammasissumik isummersortoqarsimaneranut takussutissaavoq. Qineqqusaarullu nalaani avissaartuunneq qaangerneqassappat partiini ataasiakkaani aqutsisoqarluartariaqarpoq.