Issittumi siunnersuisooqatigiit
Sara Olsvigip Issittumi Siunnersuisooqatigiinni peqataassoqassanersoq paaserusuppaa
Inuit Ataqatigiit siulittaasuata, Sara Olsvigip, paaserusuppaa Naalakkersuisut Issittumi Siunnersuisooqatigiit ataatsimiinnissaani, Iqalunni maajimi pisussami, peqataaniarnersut
Naalakkersuisuutitaqarsimasut Siumumeersoq Aleqa Hammond 2013-imi maajimiit aggustip tungaanut siuttoralugu Issittumi Siunnersuisooqatigiinni peqataajumajunnaaraluarnerisa kinguneranik maanna Inuit Ataqatigiit siulittaasuata, Sara Olsvigip, paaserusuppaa Naalakkersuisut Issittumi Siunnersuisooqatigiit ataatsimiinnissaani, Iqalunni maajimi pisussami, peqataaniarnersut.
Apeqqutilliinera paragraf 37 najoqqutaralugu Naalakkersuisunut pivoq.
- Issittumi Siunnersuisooqatigiit ukioq allorlugu naalakkersuinikkut ataatsimeersuartarpoq. Ataatsimeersuarneq kingulleq Kirunami Sverigemi 2013-mi pivoq. Taamani Naalakkersuisut peqataajunnarnertik peqqutigalugu Nunatta soqutigisaanik Issittumi naalagaaffiit arfineq pingasuusut nunanut allanut ministeriinut toqqaannartumik oqariartuuteqanngitsoorput, Sara Olsvigip apeqquteqaatini ilaatigut taama tunngavilersorpaa.
Sara Olsvigip aamma tusarusuppaa Naalakkersuisut sunik oqariartuuteqassanersut, Issittuni Siunnersuisooqatigiinni ataatsimeeqataanissamut pilersaaruteqarunik, ataatsimiinnerullu nalaani oqaaseqarsinnaatitaassagunik.
Atuaruk: Nunarput Issittumi siunnersuisooqatigiinni peqataaqqilerpoq
Ruslandip Danmarkimut siorasaarerpaluttumik pinera
Tamakkua saniatigut aamma Sara Olsvigip tusarusuppaa Ruslandip Naalagaaffeqatigiinnut danskillu NATO-p sakkussuianut akiuniarneranut ilanngunniarlutik eqqartuinerannut atatillugu siorasaarerpaluttumik nipeqarnera Naalakkersuisut qanoq eqqarsaatersuuteqarfigaat.
Tamanna pivoq russit Danmarkimi aallartitaata, Mikhail Vaninip, oqallisissianik allaaserinnilluni Jyllands-Postenimi arfininngornermi aarlerisaarutigimmagu Danmarki russinik atomip nukii atorlugit saassunneqariaannaasoq, Danmarki NATO-p sakkussuianut akiuniarneranut ilanngutissappat.
- Issittumi Siunnersuisooqatigiit naalakkersuinikkut ataatsimeersuarneranni tamanna Naalakkersuisunit oqaaseqarfigineqassamaarpa imaluunniit allatigut qisuariaateqarfigineqassamaarpa? Sara Olsvig aperivoq.
Atuaruk: Kalaallit Nunaata Sverigep siulittaasuunera akerlilersorpaa
EU-p alaatsinaattutut inissinnissaa puisillu amii
Issittumi Siunnersuisooqatigiit ataatsimiinnissaanni aamma naatsorsuutigineqarpoq EU-p siunnersuisooqatigiinni alaatsinaattutut inissivinnissaata isummerfigineqassasoq.
Taamaammat Inuit Ataqatigiit siulittaasuata aamma tusarusuppaa Naalakkersuisut qanoq iliuuseqassamaarnersut EU-p nioqqutissanik puisinit sanaajusunik eqqusseqqusiunnaarneranut atatillugu Inuit pinngitsoortinneqarnerannik sukateriniarnera eqqarsaatigalugu.
- Naalakkersuisut Nunatta puisit pillugit soqutigisai allatigulu soqutigisavut pillugit Issittumi Siunnersuisooqatigiit naalakkersuinikkut ataatsimeersuarneranni qanoq siuarsaassamaarpat?, Sara Olsvig aperivoq.
Atuaruk: Puisip amianik EU-p inatsisinik sukateriniarnera kalaallinit ernumagineqarpoq