Skip to main content

Sara Olsvig: Enoksen innermik pinnguarpoq

Inuit Ataqatigiit siulittaasua Sara Olsvig isumaqarpoq Hans Enoksenip Namminersorlutik Oqartussat suliffeqarfiutaani siulersuisuni nungusaaniarluni piumasaqarnera Nunatta nunani tamalaani politikkikkut aamma niuernikkut isigineqarneranut innarliissasoq.

(14. april 2018, nal.: 15:03 Sara Olsvigip issuarneqarnerani kalaallisoortai nutarterneqarput, aaqq.)

Sara Olsvigip Partii Naleqqap siulittaasua, Hans Enoksen, Namminersorlutik Oqartussat suliffeqarfiutaani siulersuisuni ilaasortanik nungusaaniarluni piumasaqarniarnerminik tallimanngornermi nalunaaruteqartoq isornartorsiorpaa. Hans Enoksen isumaqarpoq kalaallit nunaqavissutkisimik Namminersorlutik Oqartussat suliffeqarfiutaasa siulersuisuini ilaasortaasariaqartut.

- Hans Enoksenip Namminersorlutik Oqartussat suliffeqarfiisa siulersuisuinik soraarsitsiortornissamik piumasaqaataata ingerlatsinermi ilisimasanik, piginnaasanik tatiginninnermillu pingaarutilimmik naleqarsinnaavoq. Minnerunngitsumillu tamanna Kalaallit Nunatta nunarsuarmioqatitsinnik politikikkut namminersorlutillu inuussutissarsiortunik tusaamaneqarneranut aseruissaaq, siuariartornermullu unitsitsisuussalluni, Sara Olsvig tusagassiuutinut nalunaaruteqarluni allappoq.

Sara: Uatsinnut mattutissanngilagut

Sara Olsvigip isertuutinngilaa Hans Enoksenip siunnersuutaanut isumaqataanngilluinnarnini.

- Kalaallit Nunatsinni ukiuni kingulliunerusuni piginnaasanik qaffassaasimaneq tulluusimaarutigeqaara, ullumikkullu nunaqavissut amerlanerujussuit siulersuisuni ilaasortaaffinni pingaarutilinni ilaasortaapput, oqarpoq nangillunilu:

- Taamaattoq suli ilinniartitaanikkut kinngussaaqqavugut, avatitsinneersuniillu misilittakkat pigisavut annikitsuaraannaapput. Suliffeqarfiutigut sapinngisamik pitsaanerpaanissaminnut nunatsinnilu tamanut iluaqutaasumik ingerlatsinissaanni taakku tamaasa pisariaqartippavut. Nunat mikisut arlallit allat suliffeqarfinni ilisimasanik sapinngisamik pitsaanerpaamik iluaquteqarumallutik, nunanilu allani attavinnik pilersitsiumallutik nunani allamiunik siulersuisunut ilaasortanngortitsisarput. Taamaaliorsinnaanitsinnut immitsinnut mattutissanngilagut.

LÆS OGSÅ: DF-eq Hans E-ip siunnersuutaanut: Siunnersuut ajorluinnartoq

Ilisimasat pisariaqartut – politikkikkut attuumassuteqarnerunngitsoq

Sermitsiaq.AG-ip tallimanngornermi allaaserisaatut Hans Enoksenip suliniutini iluatsissaguniuk, qinersinerminilu taperserneqassaguni - nungusaanermik annerusumik kinguneqassaaq - maanna siulersuisuni siulittaasut arfineq-marluk aamma ilaasortat 23-it peerneqassammata.

- Aningaasaqarnerput qajannarpoq, isumaginninnermullu aningaasartuuterpassuaqarpugut. Aningaasallu taakku arlaannit pissarsiarisariaqartarpavut – taamaammallu taakku ilaatigut suliffeqarfissuaatitsinnit pisarpavut. Taamaammallumi aamma piginnaaneqarluartunik siulersuisussaqarumalluta piginnaasat ilisimasallu piunissaat pingaaruteqarluinnarpoq. Tassani politikikkut arlaannut attuumassuteqarnerit, ammip qalipaataa, oqaatsit inuiannilluunniit kikkunnit kingoqqisuuneq apeqqutaatinneqassanngilaq, Sara Olsvig oqarpoq.

LÆS OGSÅ: Tillie Martinussen: Hans, tassa

Nunatsinnit qimarrattoqarnissaa ernumagaa

Hans Enoksenip isumaa naapertorlugu nunaqavissoq kalaaliuvoq, kisianni aamma qallunaanik nunaqqateqartugut ukiorpassuarni nunaqqatigisimasatsinnik.

- Hans Enoksenip oqariartuutaa nunanit allanit aaqqissuussamik assigiinngisitsinertut isigineqassasoq isumaqarpunga. Tamanna nunani demokratimik toqqammaveqarlutik ingerlatsisuni tamani ilungersunartutut isigineqassaaq, Kalaallillu Nunaata politikikkut inuussutissarsiutitigullu tutsuiginartutut suleqatissatut tatigineqarneranik innarliissalluni, Sara Olsvig oqarpoq.

Sara Olsvigimi isumaqarpoq tamanna aningaasaliisartunik politikikkullu iluaqutigineqarsinnaanitsinnik annaasaqaatigeratarsinnaagipput.

- Taakkuli tamaasa pisariaqartippavut, minnerunngitsumik namminiilivikkiartornitsinni. Tamannalumi aamma innuttatta maaniiginnartinniarnerannut ajornakusoornerulersitsissasoq isumaqarpunga, taamaammallu Enoksen innermik pinnguartoq isumaqarpunga. Tamanna akisussaassuseqanngitsuliorneruvoq, Sara Olsvig oqarpoq.

LÆS OGSÅ: Enoksen: Siulersuisunut ilaasortat 30-t nungusarneqassapput
Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER