Sara Olsvig: Saamerliit pilliuteqassapput

Inuit Ataqatigiit (IA) qanoq isillutik Folketingimi annertunerpaamik sunniuteqarsinnaappat?

Tamanna - aammalu saamerlernit imaluunniit talerperlernit ministeriuneq sorleq tapersersussaneripput - qinersinissaq sioqqullugu partiimut pingaarnersaapput, IA-p siulittaasua Sara Olsvig erseqqissaavoq.

– Ersarissorujussuarmik oqareersimavugug qallunaat partiiannut sumulluunniit siumut pituttoreerniarata. Taamatut oqarpugut pissutigalugu isumaqatigiinniarnermi nukittuumik inissisimarusukkatta. Imaanngilaq ilaasortaaffipput talerperlernut tunereeripput. Saamerliilli pilliuteqartariaqarput, taakkua illersussallugit qularutaarutiivissagutta, Sara Olsvig erseqqissaavoq.

Tamanna peqatigalugu erseqqissarpaa partii kiap ministeriunerunissaanik toqqaanngitsuuissinnaasoq - taamaasillunilu suliassamiit suliassamut qilersorsimasassanani.

Suli saamerliupput

Tamatuma saniatigut siulittaasup erseqqissarpaa Inuit Ataqatigiit pingaartitamikkut suli saamerliusutut inissisimasut - aamma folketingimut ilaasortanngortussap Socialdemikratineersup Helle Thorning-Schmidtip ministeriuninngornissaa tapersissanngikkaluarpaguluunniit.

Inuit Ataqatigiit partii saamerliuvoq. Taamaattuuvugut nunarsuarmi sumiikkaluaruttaluunniit. Taamaattumik qallunaat talerperlernik naalakkersuisoqalernissaat Inuit Ataqatigiit imaasiallaannaq tapersernavianngilaat. Ilaasa oqarnerattut Lars Løkke Rasmussenip tikkuarnissaanut ´piareersimanngilagut´. Akerlianilli maanna naalakkersuisuusunik socialdemokratinik aqunneqartunik suleqatigiinneq pakatsinartoqartarsimavoq, Sara Olsvig isumaqarpoq.

Akuersaaginnartutut isigigaat

– Qinigaaffimmi qaangiutilersumi naalakkersuisunut naalakkersuinermi tunngaviusutut inissisimasimavugut. Tamannalu pissutigalugu pissutsit arlallit pakatsissutigaavut. Assersuutigalugu isumaqarpugut qallunaat naalakkersuisuisa nikerartut EU naalagaaffeqatigiinnermit pingaarnerutippallaaraat. Tamanna ersarissumik takusimavarput avaleraasartuunut ammassassuarnullu tunngasuni, minnerunngitsumillu Pituffimmi sullissinissamik isumaqatigiissutip annaaneqarneranut atatillugu, IA-p siulittaasua erseqqissaavoq.

– Tamatuma saniatigut ukiuni sisamani tamani aningaasanut inatsisissap isumaqatigiinniutigineqartarnerani naalakkersuisut Inuit Ataqatigiit imaluunniit atlantikup avannaanit partiit allat qaaqqusarsimanngilaat, taamatuttaarlu assersuutigalugu pinerluuteqarsimasunut isumaginniffik sakkutooqarnerlu pillugit isumaqatigiissuteqarniarluni isumaqatigiinniarnernut ataasiarlutaluunniit qaaqquneqartarsimanngilagut. Pituffimmi sullissinissamik isumaqatigiissummut annaaneqartumut atatillugu nunanut allanut ministerip qallunaat Kalaallit Nunaat pillugu oqaaseqartartui ataatsimeeqatigisimavai, uagut qaaqqunata paasissutissinnataluunniit. Pissutsit tamakkua allanngortikkusuppavut, Sara Olsvig oqarpoq.

Pakatsineq

Talerperlerni partii siuttuusoq aamma pakatsissutigineqarpoq.

– Venstre pitsaanerunngilaq. Partii kalaallit namminneq iluminni suliaannut akulerunniartuartartoq, soorlu suliniussuarnut inatsisip suliarineqarnera unitsikkallartinniaraluaramikku. Venstre-p aamma savalimmiormiut inatsisissaminnut tunngaviusunut piareersaataasiumik sulinialernerat akerlilersimavaa. Taamaattut tapersersorsinnaanngilagut. Taamaattumik partiit nunatsinneersut, Socialdemokratinik Venstre- nillu "guutitullusooq" isiginnittut paasisinnaanngilavut, IA-p siulittaasua oqarpoq.