Sara Olsvig: Qinersinissamut piareerpugut

Ualikkut nalunaaqutaq sisamap qaagilaaraa Inuit Ataqatigiit immikkoortortaqarfiini qinersisinnaatitaasut siulittaasussamut qinersipput.

Ukiuni sisamani siulittaasuusimasoq Sara Olsvig siulittaasunngorniunnermi unammillerteqarani siulittaasutut ingerlaqqippoq. Aqqaluaq B. Egede siulittaasup tulliatut, Múte Bourup Egedelu aaqqissuussaanikkut siulittaasup tulliatut ingerlaqqipput.

IA-p ataatsimeersuarnerani eqqartungassaaleqinngillat, suleqatigiissitanilu qulaaluaasuni anguniakkat nutaat saqqummiunneqarput.

- Inuk qitiutillugu sulissaagut. Angajoqqaat peqataanerulissapput, naartuersittartut ikilisarneqassapput meeqqallu angerlarsimaffimmiik allamut inissinneqarallartartut ikilisarneqassallutik, Naalakkersuisoq Agathe Fontain ilaatigut taama oqarpoq.

Agathe Fontain Ilaqutariinnermut Peqqissutsimullu suleqatigiisitami peqataavoq.

Atuaruk: IA-p ataatsimeersuarnera: Nunaqarfiit minnerit tusaaneqarusupput

Ilimagineqareersutut suleqatigiisitap aprilimi kommuunimut qinersinissamut nunaqarfiit avatangiisimulli tunngasut sammivaat.

- Inuit tamat oqartussaaqataanerat iluamik ingerlakkusupparput. Nunaqarfiit peqataanerutinneqassapput kommuunillu suleqatigiinnerat pitsanngorsarneqassalluni, Juliane Enoksen Sisimiuneersoq taama oqarpoq.

Aalisarnermut pisuussutinullu uumaatsunut piuaannartitsinissamullu suleqatigiisitap ukiut tamaasa paasiniaaqatigiinneq ingerlanneqartassasoq eqqartorsimavaat.

Pisassat nutaamik agguarneqassapput

Aningaasaqarnermut Naalakkersuisoq Aqqaluaq B. Egedep oqaaseqaammini ilassutigaa avaataasiornermi pisassiissutigineqartartut naligiimmik agguarneqartalissasut inunnut ataasiakkaanut tunniussuunnagit.

- Tasiilami inuussutissarsiornikkut periarfissatsialak taamaatinneqarsimanera puiussanngilarput. Suliffissanik amerlasuunik pilersitsisimasinnaangaluarpoq. Tasiilami suliffissaaleqinerujussuup akiornissaa iliuuseqarfigisariaqarparput ilaqutariimmi inuuniarminni ajornartorsiornertik aningortariaqalerpaat, Knud Mathiassen taama oqarpoq.

Aatsitassanut Ikummatissanullu Naalakkersuisoq Múte Bourup Egede, atortussianik piianermut uuliasiornermullu tunngassuteqartunik suleqatigiisitaliami ilaavoq.

- Ukiut pingasut ingerlanerini piiaaviit minnerit 100-rujut missaanik sulisoqarsinnaasut pilersinneqassapput. Misilittagaqarluarlernissatsinnut suliffeqarfissuaatillik utaqqisinnaapput. Múte Bourup Egede taama oqarpoq.

Takornariat pinngortitami misigisassarsiortartut isumakuluutigineqarput.

Ujaqqanik erlinnartunik timmissallu manniinik annissuinnginnissaat sillimaffigissavarput, Juliane Enoksen taama oqarpoq.

Inatsisit tunngaviusut

Tunngaviusumik inatsisissap suliarineqarnerata pingaaruteqassusaa eqqaassutigaa. Namminiilivinnissamummi suliassani pingaaruteqarluinnartut ilagimmassuk, Tunngaviusumik Inatsisissamut suleqatigiinni peqataasoq Iddimanngiiu Bianco taama oqaprpoq.

- Nunarput qimaasunik tigusisalernissaminut piareersartariaqarpoq, namminersorniaraanni piumasaqaatitaqarpoq, Ane Hansen taama oqarpoq.

Qimaasut ajornartorsiuteqaannanngillat

Ane Hansen Nunatta nunarsuarmiooqataaneranut nunanullu allanut tunngasunut suleqatigiisitami peqataavoq.

- Kina oqarami qimaasut taamaallaat ajornartorsiuteqartut? Qimaasut nakorsaasinnaapput allatigullunniit ilinniarluarsimasut, Inatsisartuni ilaasortaq Mimi Karlsen taama ilassuteqarpoq.

Unnukkut nalunaaqutaq arfineq marlup qaangilaarnerani anguniagakkat oqaluuserineqareermata nalunaaruteqareernerullu kingorna siulittaasoq Sara Olsvig oqalugiartarfimmi nikorfasoq:

- Qinersinissamut piareerpugut.